ఛత్తీస్‌గఢ్: బీజాపూర్ జిల్లా(Bijapur District)లోని భోపాల్ పట్నం పరిధిలోని ఉల్లూరు అటవీప్రాంతంలో సోమవారం మందుపాతర పేలి డీఆర్జీ జవాన్ మృతిచెందారు. పోలీసులు లక్ష్యంగా అమర్చిన ఇంప్రూవైజ్డ్ ఎక్స్‌ప్లోజివ్ డివైస్(IED)తో ఛత్తీస్‌గఢ్ పోలీస్ డిస్ట్రిక్ట్ రిజర్వ్ గార్డ్(DRG) జవాన్ ప్రాణాలు కోల్పోయారు. ఈ ఘటనలో మరో ముగ్గురు సిబ్బంది కూడా గాయపడ్డారు. రాష్ట్ర పోలీసుల యూనిట్ అయిన డీఆర్జీ బృందం ఈ ఉదయం ఇంద్రావతి నేషనల్ పార్క్ ప్రాంతంలో నక్సల్ వ్యతిరేక ఆపరేషన్‌లో ఉన్నప్పుడు ఈ పేలుడు సంభవించిందని సీనియర్ అధికారి ఒకరు తెలిపారు. ఈ పేలుడులో డీఆర్జీ జవాన్ దినేష్ నాగ్ మరణించగా, మరో ముగ్గురు సిబ్బంది గాయపడ్డారని ఆయన తెలిపారు. గాయపడిన సిబ్బందికి ప్రాథమిక చికిత్స అందించామని, వారిని అడవి నుండి తరలిస్తున్నామని తెలిపారు. ఆదివారం ప్రారంభమైన ఆపరేషన్ వివరాలను తరువాత వెల్లడిస్తామని ఆయన పేర్కొన్నారు.