మనం ఎంతకాలం జీవిస్తున్నామనేదే కాదు.. ఎంత ఆరోగ్యంగా జీవిస్తున్నామన్నది ముఖ్యం. వీటిని కొంతవరకు జన్యువులు నిర్ణయిస్తాయి. కానీ మనం ఎలా జీవిస్తున్నామనేదే కీలకం. రోజూ ఎంత సేపు వ్యాయామం చేస్తున్నాం? ఎంతసేపు నిద్రపోతున్నాం? ఏం తింటున్నాం? ఏం తాగుతున్నాం? వంటివన్నీ ఆయుష్షు మీద ప్రభావం చూపుతాయి. వీటిల్లో ఆహారం పాత్ర చాలా కీలకం అంటున్నారు నిపుణులు. ఆహారపు అలవాట్లు.. దీర్ఘకాల ఆరోగ్యం, ఆయుష్షుకు సంబంధం ఉందని అధ్యయనాల్లో తేలింది. 

ప్రోటీన్ తక్కువగా తీసుకునేవారితో పోలిస్తే ఎక్కువగా తినేవారు ఎక్కువకాలం జీవిస్తున్నట్టు.. వృద్దాప్యంలో బలంగా, ఆరోగ్యంగా ఉంటున్నట్టు పరిశోధనలు సూచిస్తున్నాయి. అయితే పప్పులు, చిరుధాన్యాలు వంటి శాకాహారం నుంచి లభించే ప్రోటీన్ ఎక్కువ మేలు చేస్తుండటం గమనార్హం. అదే మాంసం, మాంసం ఉత్పత్తుల నుంచి లభించే ప్రోటీన్‌తో అంత ప్రయోజనం కనిపించడం లేదు.

కండరాలు, ఎముకలు బలంగా ఉండటంలో ప్రోటీన్ పాత్ర కీలకం. వృద్ధులు చురుకుగా ఉండటానికి.. కింద పడిపోవడం, ఎముకలు విరగటాన్ని నివారించుకోవడానికి తోడ్పడుతుంది. 65 ఏళ్లు, అంతకన్నా ఎక్కువ వయసు గలవారికి రోజుకు 0.22-0.27 గ్రాముల ప్రోటీన్ అవసరం. ఈ మోతాదును ఉదయం అల్పాహారం, మధ్యాహ్నం భోజనం, సాయంత్రం చిరుతిండి, రాత్రి భోజనం.. ఇలా రోజంతా విభజించుకొని తీసుకుంటే శరీరం బాగా గ్రహిస్తుంది. 

విటమిన్లు

ప్రోటీన్‌తో పాటు క్యాల్షియం, విటమిన్ డి కూడా తగినంత లభించేలా చూసుకోవాలి. వయసు మీద పడుతున్న కొద్దీ ఎముకల పటుత్వం తగ్గకుండా ఉండటానికి తప్పనిసరి. పాలు, మజ్జిగ, పెరుగు, ఛీజ్‌లో క్యాల్షియం పుష్కలంగా ఉంటుంది. తృణధాన్యాలు, చిక్కుళ్లు, ఆకుకూరల్లో లభిస్తుంది. విటమిన్ డి కావాలంటే చర్మానికి తగినంత ఎండ తగిలేలా చూసుకోవాలి. చేపలు, పుట్ట గొడుగులు, గుడ్లతోనూ కొద్దిగా పొందొచ్చు. ఈ పోషకాలను ఆహార, విహారాల ద్వారా లభించేలా చూసుకోవడమే ఉత్తమం. 

కూరగాయలు

పండ్లు, కూరగాయలు, చిరుధాన్యాలు, గింజపప్పులు, చిక్కుళ్లు, సోయా వంటి వాటిల్లో ఫ్లేవనాయిడ్లు, ఫెనోలిక్ ఆమ్లాలు, లిగ్నన్ల లాంటి పాలీఫెనాల్స్ సమృద్ధిగా ఉంటాయి. ఇవి ఆరోగ్యకర వృద్ధాప్యానికి దన్నుగా నిలుస్తాయని కొన్ని పరిశోధనలు వెల్లడించాయి. చాలా పాలీఫెనాల్స్ ఒంట్లో యాంటీ ఆక్సిడెంట్లుగా పనిచేస్తాయి. ఇవి విశృంఖల కణాలను కట్టడి చేస్తాయి. పాలీఫెనాల్స్‌లో వాపు ప్రక్రియను నిలువరించే గుణాలు కూడా ఉంటాయి. ఫలింగా క్యాన్సర్లు, గుండెజబ్బులు, మధుమేహం, నాడీక్షీణత సమస్యల ముప్పు తగ్గుతుంది. 

మంచి కొలెస్ట్రాల్

గింజలు, పలుకులు, అవకాడో.. వేరుశనగ నూనె, నువ్వుల నూనె, ఆలివ్ నూనె వంటి నూనెల్లోని మంచి కొవ్వులు మరణం ముప్పు తగ్గటానికి తోడ్పడుతున్నట్టు పరిశోధనలు సూచిస్తున్నాయి. అదే మాంసం, మాంసం ఉత్పత్తుల్లోని కొవ్వులతో మరణం ముప్పు పెరుగుతోందని చెబుతున్నాయి. సాల్మన్, టూనా, సార్‌డైన్స్ వంటి చేపల్లోని ఒమేగా కొవ్వు ఆమ్లాలు మెదడు ఆరోగ్యానికి, ఆయుష్షు పెరగడానికి తోడ్పడతాయి. 

అల్ట్రాప్రాసెస్డ్ ఫుడ్స్ వద్దు

బర్గర్లు, పిజ్జాలు, పఫ్స్, కేక్స్ వంటి బేకరీ పదార్థాలు.. కూల్‌డ్రింకులకు దూరంగా ఉండటం మంచిది. వీటిల్లో పిండి పదార్థాలు, చక్కెరలు పెద్దమొత్తంలో ఉంటాయి. ఇవి త్వరగా జీర్ణమవుతాయి. దీంతో రక్తంలో గ్లూకోజు మోతాదులు ఉన్నట్టుండి పెరుగుతాయి. క్రమంగా మధుమేహం, గుండెజబ్బుల ముప్పు ఎక్కువవుతుంది. చాలా అల్ట్రాప్రాసెస్డ్ ఫుడ్స్‌లో సోడియం కూడా ఎక్కువగానే ఉంటుంది. ఇది అధిక రక్తపోటుకు దారితీస్తుంది.