కోల్‌కతా: దక్షిణ 24 పరగణాల జిల్లాలోని ఒక గిడ్డంగిలో జరిగిన అగ్నిప్రమాదంలో ఎనిమిది మంది మరణించగా, ప్రాథమిక విచారణలో ఆ యూనిట్లలో కనీస భద్రతా ఏర్పాట్లు లేవని తేలిందని పశ్చిమ బెంగాల్(West Bengal) అగ్నిమాపక సేవల శాఖ మంత్రి సుజిత్ బోస్ మంగళవారం తెలిపారు. సోమవారం తెల్లవారుజామున రెండు గిడ్డంగులలో మంటలు చెలరేగిన ప్రదేశాన్ని పరిశీలించిన బోస్, ఈ ఘటనకు సంబంధించి పోలీసు కేసు నమోదు చేసి, సమగ్ర విచారణ జరుపుతామని తెలిపారు. 

“నేను డైరెక్టర్ జనరల్ (అగ్నిమాపక సేవలు)తో మాట్లాడాను. అక్కడ అగ్నిమాపక వ్యవస్థ అందుబాటులో లేదు. అగ్ని ప్రమాద తనిఖీ జరిగిందా లేదా అనేది కూడా మనం చూడాలి. ఒక ఫోరెన్సిక్ బృందం సంఘటనా స్థలాన్ని సందర్శిస్తుంది. ఎఫ్ఐఆర్ నమోదు చేసి, పూర్తి స్థాయి విచారణ చేపడతాం,” అని మంత్రి విలేకరులతో అన్నారు. ఏడు గంటల పాటు శ్రమించిన అగ్నిమాపక సిబ్బంది మంటలను అదుపుచేశారు. మృతులంతా గోదాములోని కార్మికులని పోలీసులు గుర్తించారు.