జిల్లా అదనపు కలెక్టర్ (స్థానిక సంస్థలు) దీపక్ తివారి

కుమ్రంభీం ఆసిఫాబాద్,(విజయక్రాంతి): 2వ సాధారణ పంచాయతీ ఎన్నికల నేపథ్యంలో మార్గదర్శకాలను సమర్ధవంతంగా అమలు చేయాలని జిల్లా అదనపు కలెక్టర్ (స్థానిక సంస్థలు) దీపక్ తివారి అన్నారు. శనివారం జిల్లాలోని సిర్పూర్(టి) మండల కేంద్రంలోని రైతు వేదికలో నిర్వహించిన రిటర్నింగ్, సహాయ రిటర్నింగ్ అధికారుల శిక్షణ కార్యక్రమానికి కాగజ్ నగర్ సబ్ కలెక్టర్ శ్రద్ధ శుక్లా, అధికారులతో కలిసి హాజరయ్యారు. ఈ సందర్భంగా జిల్లా అదనపు కలెక్టర్ మాట్లాడుతూ సర్పంచ్, వార్డు సభ్యుల స్థానాలకు జరుగుతున్న ఎన్నికల నిర్వహణ ప్రక్రియలో మార్గదర్శకాలను ఖచ్చితంగా పాటించాలని తెలిపారు.

ఎన్నికల నిర్వహణ ప్రక్రియలో భాగంగా పోలింగ్ కేంద్రాల ఏర్పాటు, పోలింగ్ సిబ్బంది సమన్వయం, ఎన్నికల సామాగ్రి పంపిణీ అంశాలలో జాగ్రత్తగా వ్యవహరించాలని తెలిపారు. అధికారులు తమకు కేటాయించిన విధులను సమర్థవంతంగా నిర్వహించాలని, విధులలో పారదర్శకంగా, నిష్పక్షపాతంగా వ్యవహరించాలని తెలిపారు. ఏవైనా సమస్యలు తలెత్తినట్లయితే వెంటనే ఉన్నత అధికారులను సంప్రదించి పరిష్కరించే దిశగా చర్యలు తీసుకోవాలని తెలిపారు. పోలింగ్ రోజు అమలు చేయవలసిన ఎన్నికల ప్రవర్తన నియమావళి, భద్రత చర్యలు, రవాణా, కమ్యూనికేషన్, త్రాగునీరు, విద్యుత్ ఇతర ప్రాథమిక సదుపాయాల లభ్యతను ముందుగానే పరిశీలించుకోవాలని సూచించారు.

ఎన్నికల సంఘం నియమాలకు లోబడి నామినేషన్ల పరిశీలన, అభ్యర్థుల ప్రకటన, గుర్తుల కేటాయింపు ప్రక్రియలో అప్రమత్తంగా ఉండాలని, ఎలాంటి పొరపాట్లకు తావు లేకుండా ఎన్నికల ప్రక్రియ నిర్వహించాలని తెలిపారు. ఎన్నికలను శాంతియుతంగా నిర్వహించే విధంగా అధికారులు సమన్వయంతో వ్యవహరించాలని, విధులలో సమయపాలన పాటిస్తూ బాధ్యతాయుతంగా విధులు నిర్వర్తించాలని తెలిపారు.ఈ కార్యక్రమంలో మండల స్థాయి అధికారులు, ఎన్నికల విభాగం అధికారులు, సిబ్బంది పాల్గొన్నారు.