బీజాపూర్: ఛత్తీస్‌గఢ్ రాష్ట్రం బీజాపూర్ జిల్లాలో(Bijapur) గురువారం మావోయిస్టులు, భద్రతా బలగాలకు మధ్య మరోసారి ఎదురుకాల్పులు చోటుచేసుకున్నాయి. ఎదురుకాల్పుల్లో నిన్న, ఇవాళ కలిపి 19 మంది మావోయిస్టులు హతమయ్యారని అధికారులు ప్రకటించారు. బీజాపూర్ జిల్లాలో బుధవారం జరిగిన ఎన్‌కౌంటర్‌లో భద్రతా దళాలు ఒక టాప్ మావోయిస్టు కమాండర్‌తో సహా కనీసం 18 మంది నక్సలైట్లను మట్టుబెట్టాయని గురువారం ఒక సీనియర్ అధికారి తెలిపారు. బీజాపూర్-దంతేవాడ జిల్లాల సరిహద్దులోని అడవిలో భద్రతా దళాలు నక్సల్ వ్యతిరేక ఆపరేషన్ ప్రారంభించిన తర్వాత ఈ ఎన్‌కౌంటర్ జరిగింది. ప్రారంభంలో 12 మంది మావోయిస్టులు మరణించారు.

కానీ దక్షిణ బస్తర్ ప్రాంత పోలీసు డిప్యూటీ ఇన్‌స్పెక్టర్ జనరల్ (డిఐజి) కమ్లోచన్ కశ్యప్ గురువారం మరో ఆరు మృతదేహాలను స్వాధీనం చేసుకున్నట్లు ధృవీకరించారు. హతమైన నక్సలైట్ల నుండి భద్రతా దళాలు భారీ ఆయుధాలు,యు మందుగుండు సామగ్రిని మరియు ఎకె-47 రైఫిళ్లను స్వాధీనం చేసుకున్నాయి. భద్రతా దళాలు మట్టుబెట్టిన 18 మంది నక్సలైట్లలో ఒకరిని మోడియం వెల్లగా గుర్తించారు. అతను పీపుల్స్ లిబరేషన్ గెరిల్లా ఆర్మీ (PLGA) కంపెనీ నంబర్ 2 క్రియాశీల కమాండర్. ఇన్స్పెక్టర్ జనరల్ ఆఫ్ పోలీస్ (బస్తర్ రేంజ్) సుందర్రాజ్ పట్టిలింగం ప్రకారం, వెల్ల అనేక దాడులలో పాల్గొన్నాడు. వాటిలో 2020లో సుక్మాలో జరిగిన మిన్పా ఆకస్మిక దాడిలో 17 మంది భద్రతా సిబ్బంది ప్రాణాలు కోల్పోయారు.