1. హైదరాబాద్‌లో భారీ సైబర్ మోసం
2. అమ్మాయి మెసేజ్.. డాక్టర్ చాటింగ్
3. కష్టాల్లో ఉన్నానంటే కరిగిపోయాడు
4. విడతల వారీగా కోట్లు సమర్పించుకున్న వైనం

 హైదరాబాద్, సిటీ బ్యూరో నవంబర్ 29 (విజయక్రాంతి) : సైబర్ నేరగాళ్ల వలలో సామాన్యులే కాదు, సమాజంలో అత్యున్నత హోదాలో ఉన్నవారు, విద్యావంతులు సైతం చిక్కుకుంటున్నారు. తాజాగా హైదరాబాద్‌లోని హబ్సిగూడలో జరిగిన ఓ భారీ సైబర్ మోసం ఇప్పుడు సంచలనంగా మారింది. ఫేస్‌బుక్ పరిచయం ఓ డెంటల్ డాక్టర్‌ను ఏకంగా రూ. 14 కోట్ల అప్పుల పాలు చేసింది. 

హబ్సిగూడకు చెందిన ఓ ప్రముఖ డెంటల్ డాక్టర్‌కు ఫేస్‌బుక్‌లో మౌనిక అనే పేరుతో ఉన్న ఖాతా నుంచి ఫ్రెండ్ రిక్వెస్ట్, మెసేజ్ వచ్చింది. అవతలి నుంచి అమ్మాయి మెసేజ్ చేసిందని సంబరపడిపోయిన సదరు వైద్యుడు వెంటనే స్పందించాడు. అలా వారిద్దరి మధ్య పరిచయం ఏర్పడి, అది కాస్తా గాఢమైన చాటింగ్‌కు దారితీసింది. కొద్దిరోజుల పాటు నమ్మకం కలిగించేలా మాట్లాడిన సైబర్ కేటుగాళ్లు అసలు ప్లాన్ అమలు చేశారు.

ఆర్థిక కష్టాలు ఉన్నాయని..

చాటింగ్ ముదిరిన తర్వాత.. తనకు చాలా ఆర్థిక కష్టాలు ఉన్నాయని, ఆదుకోవాలని సదరు మౌనిక డాక్టర్‌ను కోరింది. ఆమె మాయలో పూర్తిగా పడిపోయిన వైద్యుడు వెనుకా ముందు ఆలోచించకుండా డబ్బు పంపడం మొదలుపెట్టాడు. అలా విడతల వారీగా ఏకంగా రూ. 14 కోట్లు ఆమె ఖాతాలకు బదిలీ చేశాడు. డబ్బు మొత్తం చేతికి అందాక అవతలి నుంచి స్పందన కరువైంది.

దీంతో తాను మోసపోయానని, అది సైబర్ నేరగాళ్ల పన్నాగం అని డాక్టర్ ఆలస్యంగా గ్రహించాడు. కోటి కాదు.. రెండు కోట్లు కాదు.. ఏకంగా 14 కోట్లు పోగొట్టుకోవడంతో లబోదిబోమంటూ సైబర్ క్రైమ్ పోలీసులను ఆశ్రయించాడు.  బాధితుడి ఫిర్యాదు మేరకు కేసు నమోదు చేసుకున్న పోలీసులు దర్యాప్తు ప్రారంభించారు. ఫేస్‌బుక్‌లో అపరిచితుల నుంచి వచ్చే రిక్వెస్టుల పట్ల అప్రమత్తంగా ఉండాలని పోలీసులు హెచ్చరిస్తున్నారు.