- బీరెల్లి గూడెంలో వరి పొలాల పరిశీలన

- మండల వ్యవసాయ అధికారిని ఎస్ పద్మజ

మునుగోడు,(విజయక్రాంతి): రైతులు వరి పంటలో అగ్గి తెగులు పట్ల అప్రమత్తంగా ఉండాలని మండల వ్యవసాయ అధికారిని ఎస్.పద్మజ అన్నారు. మంగళవారం మండలంలోని బీరెల్లి గూడెం గ్రామంలో వరి పొలాలను వ్యవసాయ అధికారులు సందర్శించి మాట్లాడారు. వరి పంటలో అగ్గి తెగులు, ఇతర పురుగు తెగుళ్లు ఉన్నట్లు గుర్తించారు. అగ్గి తెగులు నివారణకు ట్రై సైక్లోజోల్ 75% డబ్ల్యూపి 160 గ్రాములు,సాఫ్ 200 గ్రాములు ఒక్కో ఎకరానికి 200 లీటర్ల నీటిలో కలిపి పిచికారీ చేయాలని రైతులకు సూచించారు.

జీవ నియంత్రణ పద్ధతిలో భాగంగా సుడోమోనాస్ ఫ్లోరిసిన్స్ బ్యాక్టీరియాను ఒక లీటర్ నీటికి 10 గ్రాములు చొప్పున కలిపి పిచికారీ చేయాలని తెలిపారు.నాట్లు వేసిన నెల రోజుల తర్వాత పురుగుల నియంత్రణకు గుళికలు వేయడం వల్ల ప్రయోజనం ఉండదని, కావున గుళికలను ఉపయోగించకుండా స్ప్రే మందులను మాత్రమే వాడాలని అధికారులు సూచించారు.

అలాగే పురుగుల మందులతో పాటు వేప నూనె కలిపి పిచికారీ చేయడం వలన మందుల ప్రభావం సుమారు 25 శాతం వరకు పెరుగుతుందని వివరించారు.జీవామృతం తయారీ విధానం మరియు దాని ఉపయోగాలపై రైతులకు అవగాహన కల్పించారు. ఈ కార్యక్రమంలో వ్యవసాయ విస్తరణాధికారి ఎం. నరసింహ,రైతులు దోటి వెంకన్న, దోటి సైదులు ఉన్నారు.