ఆయిల్ పామ్ సాగుతో అద్భుత ఫలితాలు సాధిస్తున్న ప్రభాకర్ రెడ్డికి సన్మానం

సుల్తానాబాద్,(విజయక్రాంతి): ​పెద్దపల్లి జిల్లా సుల్తానాబాద్ మండలం రేగడి మద్దికుంట గ్రామంలోని గోపిడి ప్రభాకర్ రెడ్డి ఆయిల్ పామ్ సాగుతో అద్భుత ఫలితాలు సాధిస్తున్నారు. జిల్లా ఉద్యాన, పట్టు పరిశ్రమ అధికారి గడ్డం శ్యామ్ ప్రసాద్ తోటను శుక్రవారం  పరిశీలించి, రైతును సన్మానించారు. వరి సాగుకు భిన్నంగా ఆయిల్ పామ్ వైపు మళ్ళిన రైతు ప్రభాకర్ రెడ్డి, అంతర పంటలతో అదనపు ఆదాయం పొందారు. ప్రభుత్వం అందించిన ప్రోత్సాహకాలతో, ఇప్పుడు దిగుబడి దశకు చేరుకుంది. చీడపీడల బెడద లేని ఈ పంట, అడవి జంతువుల నుండి కూడా సురక్షితమని రైతు పేర్కొన్నారు.  అల్లీపూర్ గ్రామానికి చెందిన గోపిడి ప్రభాకర్ రెడ్డి తన వ్యవసాయ పద్ధతుల్లో విప్లవాత్మక మార్పులు తీసుకొచ్చారు.

గతంలో తన ఆరు ఎకరాల భూమిలో వరి సాగు చేసే ప్రభాకర్ రెడ్డికి, పెట్టుబడులు పోను ఏడాదికి దాదాపు 3 లక్షల రూపాయల ఆదాయం వచ్చేది. అయితే, 2022లో తెలంగాణ ప్రభుత్వం ఉద్యాన శాఖ ద్వారా చేపట్టిన ఆయిల్ పామ్ సాగు ప్రోత్సాహకాలను అందిపుచ్చుకోవాలని ఆయన నిర్ణయించుకున్నారు.ఫలితంగా, 2022 సెప్టెంబర్ 9న ప్రభుత్వం అందించిన సబ్సిడీతో ఆరు ఎకరాల్లో ఆయిల్ పామ్ మొక్కలను నాటారు.ఆయిల్ పామ్ మొక్కలు నాటిన తర్వాత, మొదటి సంవత్సరంలో అంతర పంటగా అరటిని, రెండవ సంవత్సరంలో కూరగాయలను సాగు చేశారు. దీనివల్ల ఉద్యాన శాఖ ప్రోత్సాహంతో పాటు, ఈ అంతర పంటల ద్వారా అదనపు ఆదాయం లభించింది.

మొక్కల పెరుగుదల, ఎరువుల యాజమాన్యం మరియు నీటి నిర్వహణపై వ్యవసాయ అధికారుల సలహాలను పాటిస్తూ, తోటను క్రమపద్ధతిలో సాగు చేశారు.​అంచనాలకు మించిన దిగుబడిప్రస్తుతం ఆయిల్ పామ్ గెలలు కోతకు సిద్ధమయ్యాయి. మొదటి కోతలోనే ఆరు టన్నుల వరకు దిగుబడి వస్తుందని రైతు అంచనా వేస్తున్నారు. మార్కెట్ ధర ప్రకారం టన్నుకు 23,780 రూపాయల చొప్పున ఆదాయం అందుతుందని, అన్ని ఖర్చులు పోను సుమారు 1.5 లక్షల రూపాయల నికర లాభం వస్తుందని ఆయన సంతోషం వ్యక్తం చేశారు. ఆయిల్ పామ్ సాగులో ప్రతి నెలా ఆదాయం వచ్చే అవకాశం ఉండటం విశేషం.వరిగడ్డి వంటి సాంప్రదాయ పంటలతో పోలిస్తే, ఆయిల్ పామ్ సాగు చాలా సులభమని ప్రభాకర్ రెడ్డి తోటి రైతులకు సూచిస్తున్నారు. ముఖ్యంగా పంటకు చీడపీడల బెడద చాలా తక్కువని, అడవి పందులు లేదా కోతుల వంటి జంతువుల వల్ల నష్టం జరిగే అవకాశం లేదని ఆయన తెలిపారు. దీంతో రైతులు భయం లేకుండా ఈ పంటను సాగు చేసుకోవచ్చని ఆయన భరోసా ఇచ్చారు.