తాయ్: హాంకాంగ్‌లోని తాయ్ పోలోని నివాస ప్రాంతమైన వాంగ్ ఫక్ కోర్టులో(Hong Kong buildings) జరిగిన అగ్నిప్రమాదంలో(Fire Accident) కనీసం 44 మంది మరణించగా, మరో 45 మంది గాయపడ్డారని హాంకాంగ్ పోలీస్ ఫోర్స్ గురువారం విలేకరుల సమావేశంలో తెలిపింది. ఈ దారుణానికి పాల్పడినట్లు అనుమానిస్తున్న ముగ్గురు వ్యక్తులను అరెస్టు చేసినట్లు హాంకాంగ్ పోలీస్ ఫోర్స్‌ను ఉటంకిస్తూ జిన్హువా వార్తా సంస్థ నివేదించింది. ఈ ఘటనపై హాంకాంగ్ చీఫ్ ఎగ్జిక్యూటివ్ జాన్ లీ విలేకరుల సమావేశంలో మాట్లాడుతూ... అగ్నిమాపక సిబ్బంది అవిశ్రాంత ప్రయత్నాల తర్వాత వాంగ్ ఫక్ కోర్టులో చెలరేగిన మంటలను క్రమంగా అదుపులోకి తెచ్చామన్నారు. దాదాపు 279 మంది ఇంకా కనిపించడం లేదని లీ పేర్కొన్నారు. 

ఇరవై తొమ్మిది మంది ఇంకా ఆసుపత్రిలోనే ఉన్నారు. వీరిలో ఏడుగురి పరిస్థితి విషమంగా ఉందని చెప్పారు. పరిస్థితి చూసి తాను చాలా బాధపడ్డానని లీ అన్నారు. బయటి నుండి చూస్తే, మూడు భవనాల్లో ఇప్పుడు మంటలు(Hong Kong fire) కనిపించడం లేదని, మరో నాలుగు భవనాల్లో అప్పుడప్పుడు మంటలు చెలరేగుతున్న ప్రదేశాలు మాత్రమే ఉన్నాయన్నారు. ప్రభుత్వం సహాయక చర్యలకు పూర్తి మద్దతు ఇవ్వడానికి అన్ని వనరులను సమీకరిస్తుందని తెలిపారు. మంటలను ఆర్పడం, చిక్కుకున్న నివాసితులను రక్షించడం, గాయపడిన వారికి చికిత్స చేయడం, కుటుంబాలకు సహాయం ప్రమాదంపై పూర్తి దర్యాప్తు నిర్వహించాలని అధికారులను ఆదేశించారు.

బుధవారం స్థానిక సమయం ప్రకారం మధ్యాహ్నం 2.51 గంటలకు ప్రమాదం గురించి అగ్నిమాపక సేవల విభాగానికి సమాచారం అందింది. తీవ్రమైన మంటలు చెలరేగడంతో, స్థానిక సమయం ప్రకారం సాయంత్రం 6.22 గంటలకు 5వ నంబర్ అగ్ని ప్రమాద హెచ్చరికను ఆ విభాగం ప్రకటించింది. వాంగ్ ఫక్ కోర్టులో ఎనిమిది నివాస భవనాలు ఉన్నాయి. మంటలు ఒక భవనం నుండి మరో ఏడు భవనాలకు వ్యాపించాయి. హాంకాంగ్ హాస్పిటల్ అథారిటీ తన మేజర్ ఇన్సిడెంట్ కంట్రోల్ సెంటర్‌ను యాక్టివేట్ చేసింది. బాధిత విద్యార్థులకు తగిన మద్దతు అందించడానికి విద్యా బ్యూరో విద్యా మనస్తత్వవేత్తలు, సంబంధిత సిబ్బందిని తాత్కాలిక ఆశ్రయాలకు తరలించింది. జిల్లాలోని అనేక పాఠశాలలకు గురువారం సెలవు ప్రకటించారు. అనేక సంస్థలు, వ్యక్తులు స్వచ్ఛందంగా సామాగ్రిని విరాళంగా ఇచ్చారని తాయ్ పో కేర్ టీమ్ సభ్యుడు, జిల్లా కౌన్సిలర్ లామ్ యిక్ కుయెన్ పేర్కొన్నారు.