భువనేశ్వర్: ఒడిశాలో రెండు రోజుల పర్యటన సందర్భంగా అసెంబ్లీని ఉద్దేశించి ప్రసంగించిన తొలి రాష్ట్రపతిగా ద్రౌపది ముర్ము(Draupadi Murmu as President) గురువారం చరిత్ర సృష్టించనున్నారు. ముర్ము సాయంత్రం 4.30 గంటల నుండి 5.30 గంటల వరకు ఒడిశా శాసనసభ సభ్యులను ఉద్దేశించి ప్రసంగిస్తారని స్పీకర్ సురామ పాధి తెలిపారు. రాష్ట్రపతి ఒడిశాకు చెందినవారు, అసెంబ్లీ మాజీ సభ్యురాలు. ద్రౌపది ముర్ము మధ్యాహ్నం 2 గంటలకు ఇక్కడి బిజు పట్నాయక్ అంతర్జాతీయ విమానాశ్రయానికి చేరుకుని, 2.20 గంటలకు రాజ్ భవన్ చేరుకుని కళింగ అతిథి నివాస్‌ను ప్రారంభిస్తారని అధికారులు తెలిపారు.

ఆమె మయూర్‌భంజ్ జిల్లాలోని రాయరంగ్‌పూర్ స్థానం నుండి ఒడిశా అసెంబ్లీకి రెండుసార్లు(2000-2004) ఎన్నికయ్యారు. ఒడిశా అసెంబ్లీని సందర్శించి ప్రసంగించే మొదటి రాష్ట్రపతి ముర్ము అని  స్పీకర్ సురామ పాధి అన్నారు. ఒడిశాలోని బీజేడీ-బీజేపీ సంకీర్ణ ప్రభుత్వంలో ముర్ము మంత్రిగా కూడా పనిచేశారు. ఆమె మంత్రిగా పనిచేసిన అసెంబ్లీలోని గది నంబర్ 11 ను కూడా రాష్ట్రపతి సందర్శిస్తారు. ఆమె మార్చి 6, 2000 నుండి ఆగస్టు 6, 2002 వరకు వాణిజ్యం, రవాణా శాఖకు స్వతంత్ర బాధ్యతతో మంత్రిగా, ఆగస్టు 6, 2002 నుండి మే 16, 2004 వరకు మత్స్య, జంతు వనరుల అభివృద్ధి శాఖకు మంత్రిగా పనిచేశారు.

ఆమె సందర్శనకు ముందే ఛాంబర్‌ను పునరుద్ధరించామని పార్లమెంటరీ వ్యవహారాల మంత్రి ముఖేష్ మహాలింగ్ తెలిపారు. 2007లో, ముర్ము ఒడిశా అసెంబ్లీ ఉత్తమ ఎమ్మెల్యేగా ‘నీలకాంత్ అవార్డు’ అందుకున్నారు. రాష్ట్రపతి అసెంబ్లీని ఉద్దేశించి ప్రసంగించే కార్యక్రమానికి గవర్నర్ హరిబాబు కంభంపాటి, రాష్ట్రానికి చెందిన ఎంపీలు, ప్రముఖ వ్యక్తులు కూడా హాజరు కానున్నారు. రాష్ట్రపతి పర్యటనను దృష్టిలో ఉంచుకుని, ఒడిశా ప్రభుత్వం భువనేశ్వర్‌లో, అసెంబ్లీ లోపల, చుట్టుపక్కల విస్తృత భద్రతా ఏర్పాట్లు చేసినట్లు అధికారులు తెలిపారు. అసెంబ్లీ శీతాకాల సమావేశాలు శుక్రవారం ప్రారంభమై డిసెంబర్ 31 వరకు కొనసాగనున్నాయి. ముర్ము నవంబర్ 28న ఉత్తరప్రదేశ్‌కు వెళ్లనున్నారు.