పనాజీ: దక్షిణ గోవా జిల్లాలోని శ్రీ సంస్థాన్ గోకర్ణ జీవోత్తం మఠంలో(Shree Samsthana Gokarna Partagali Jeevottama Math) 77 అడుగుల ఎత్తైన రాముడి కాంస్య విగ్రహాన్ని ప్రధానమంత్రి నరేంద్ర మోడీ(PM Narendra Modi) గురువారం ఆవిష్కరిస్తారని మఠం ప్రతినిధి తెలిపారు. ప్రధానమంత్రి మధ్యాహ్నం 3.45 గంటలకు వేదిక వద్దకు చేరుకుంటారు. మఠం ప్రాంగణంలో ప్రత్యేక హెలిప్యాడ్ నిర్మించినట్లు దాని కేంద్ర కమిటీ చైర్మన్ శ్రీనివాస్ డెంపో తెలిపారు. గుజరాత్‌లో స్టాట్యూ ఆఫ్ యూనిటీని రూపొందించిన శిల్పి రామ్ సుతార్, శ్రీరాముడి విగ్రహాన్ని తయారు చేశారని గోవా ప్రజా పనుల శాఖ మంత్రి దిగంబర్ కామత్ తెలిపారు. 

ఇది ప్రపంచంలోనే ఎత్తైన శ్రీరాముడి విగ్రహం అవుతుందని మంత్రి అన్నారు. బహిరంగ సభలో ప్రసంగించే ముందు ప్రధాని మోదీ మఠంలో ఉన్న ఆలయాన్ని సందర్శిస్తారని డెంపో తెలిపారు. ఈ కార్యక్రమానికి గోవా గవర్నర్ అశోక్ గజపతి రాజు, ముఖ్యమంత్రి ప్రమోద్ సావంత్, కేంద్ర మంత్రి శ్రీపాద నాయక్, రాష్ట్ర క్యాబినెట్ మంత్రులు హాజరుకానున్నట్లు దిగంబర్ కామత్ తెలిపారు. మఠం సంప్రదాయం 550 సంవత్సరాలను పురస్కరించుకుని నవంబర్ 27 నుండి డిసెంబర్ 7 వరకు వివిధ కార్యక్రమాలు జరుగుతున్నాయి. గోవాలోని మఠం ప్రాంగణాన్ని 370 సంవత్సరాల క్రితం కనకోనా (దక్షిణ గోవా జిల్లా)లోని పార్టగల్ గ్రామంలో నిర్మించారని డెంపో చెప్పారు. ఈ రోజుల్లో అనేక కార్యక్రమాలు నిర్వహించాలని ప్రణాళికలు వేస్తున్నామని, ప్రతిరోజూ 7,000 నుండి 10,000 మంది మఠం ప్రాంగణానికి వస్తారని పేర్కొన్నారు. యుగయుగాలుగా ఆధ్యాత్మిక కేంద్రంగా సేవలందిస్తున్న మఠం ప్రాంగణాన్ని పూర్తిగా పునరుద్ధరించి ఆధునిక రూపాన్ని ఇచ్చామని  గోవా ప్రజా పనుల శాఖ మంత్రి స్పష్టం చేశారు.