ముంబై: ముంబైలోని అంధేరి వెస్ట్ ప్రాంతంలో ఉన్న 23 అంతస్తుల నివాస భవనంలో గురువారం ఉదయం అగ్నిప్రమాదం సంభవించింది. ఈ భారీ ప్రమాదం నుంచి దాదాపు 40 మందిని రక్షించినట్లు అధికారులు తెలిపారు. వీరా దేశాయ్ రోడ్డులోని కంట్రీ క్లబ్ సమీపంలో ఉన్న సోరెంటో టవర్‌లో ఉదయం 10 గంటల ప్రాంతంలో చెలరేగిన అగ్నిప్రమాదంలో ఎవరికీ గాయాలు కాలేదని వారు తెలిపారు. 

ఒక పౌర అధికారి మాట్లాడుతూ... 16వ అంతస్తులోని సురక్షిత ప్రాంతం నుండి మెట్ల మార్గం ద్వారా 30-40 మందిని రక్షించామని, అదే సమయంలో ఒక మహిళతో సహా మరో ముగ్గురిని శ్వాస పరికరాల సహాయంతో 15వ అంతస్తులోని ఒక ఫ్లాట్ నుండి సురక్షిత ప్రాంతానికి తరలించామని పేర్కొన్నారు. ఈ అగ్నిప్రమాదం 10వ, 21వ అంతస్తుల మధ్య ఉన్న ఎలక్ట్రికల్ షాఫ్ట్‌లోని వైరింగ్, ఇతర భాగాలను, అలాగే వివిధ అంతస్తులలోని డక్ట్ సమీపంలో ఉన్న రూటర్లు, షూ రాక్‌లు, చెక్క ఫర్నిచర్‌ను ప్రభావితం చేసిందని చెప్పారు. అగ్నిమాపక దళం కనీసం నాలుగు అగ్నిమాపక యంత్రాలను, ఇతర పరికరాలను మోహరించి, ఉదయం 11.37 గంటలకు మంటలను ఆర్పివేసిందని అధికారి తెలిపారు. అగ్నిప్రమాదానికి గల కారణం ఇంకా నిర్ధారించాల్సి ఉందని ఆయన తెలిపారు.