పగటి పూట ఏదో కాసేపు కునుకు తీస్తే ఇబ్బందేమీ ఉండదు. కానీ ఎక్కువసేపు పడుకుంటే రాత్రి పూట నిద్ర అవసరం తగ్గుతుంది. ఒంట్లో జీవ గడియారం గతి తప్పుతుంది. దీంతో పగటి పూట చురుకుగా, రాత్రిపూట నిద్ర వచ్చే ప్రక్రియ అస్తవ్యస్త మవుతుంది. కాబట్టి నిద్ర సమస్యలతో బాధపడేవారు పగటి నిద్రను మానేస్తే మంచిది. 

మన జీవితంలో దాదాపు సగం కాలాన్ని నిద్రలోనే గడుపుతాం. ఆరోగ్యానికి ఎంతో అవసరం. సరిగా నిద్ర పట్టకపోతే చిరాకు, అలసట, విచారం కలుగుతాయి. శారీరక స్పందనల వేగం తగ్గుతుంది. తలనొప్పి, మానసిక ఒత్తిడి వంటి సమస్యలెన్నో చుట్టుముడతాయి. దీర్ఘకాలంగా తగినంత నిద్ర పట్టకపోతే నిద్రలేమి సమస్యకు దారితీస్తుంది. రకరకాల అంశాలు నిద్రను ప్రభావితం చేస్తాయి. సరైన కారణాన్ని గుర్తిస్తే దానిని సులువుగా సరిదిద్దుకోవచ్చు.

పనిభారం..

రోజంతా పనిచేయడానికి మనమేమీ యంత్రాలం కాదు. పనులతో సతమతమైన మనసుకు, కండరాలకు విశ్రాంతి తప్పనిసరి. అప్పటి వరకూ మనల్ని చురుకుగా ఉంచిన అడ్రినలిన్ హార్మోన్ మోతాదులు తగ్గుముఖం పట్టేలా చూసుకోవాలి. అంటే పడుకోవడానికి కొద్ది గంటల ముందే శరీరాన్ని నిద్రకు సన్నద్ధం చేయాలన్నమాట. అందువల్ల ఏ పనీ పెట్టకోవద్దు. ఆఫీసు రిపోర్టుల వంటివి ముందేసుకుని మేలుకోవద్దు. ఇష్టమైన పుస్తకం చదవడం, శ్రావ్యమైన సంగీతాన్ని వినటం, ధ్యానం చేయడం వంటివి మనసుకు విశ్రాంతినిచ్చే పనులు చేయాలి. 

వ్యాయామం..

శారీరక శ్రమ నిద్ర బాగా పట్టటానికి తోడ్పడుతుంది. కాబట్టి రోజూ ఉదయాన్నే వ్యాయామం చేయడం ఉత్తమం. నడక, పరుగు, సైకిల్ తొక్కడం వంటివి చేస్తే స్వచ్చమైన గాలికి మనసు, శరీరం ఉత్సాహంతో నిండిపోతుంది. రాత్రిపూట గాఢంగానూ నిద్ర పడుతుంది. 

టైమ్‌కి నిద్రపోవడం..

షిఫ్ట్ ఉద్యోగులు, తరచూ రాత్రిపూట ఆలస్యంగా పడుకునేవారిలో నిద్ర సమస్యలు తలెత్తటానికి ప్రధాన కారణం వేళకు నిద్ర పోకపోవడం. కాబట్టి రోజూ ఒకే సమయానికి పడుకోవడం, లేవటం చాలా ముఖ్యం. దీంతో నిద్ర వేళలు నియమబద్ధం అవుతాయి. సాయంత్రం వేళ గోరు వెచ్చటి నీటితో స్నానం చేయడం, గ్లాసు పాలు తాగటం, ఇంట్లో లైట్ల వెలుగు తగ్గించుకోవడం ద్వారా మరింత త్వరగానూ నిద్ర పట్టేలా చేస్తాయి. 

డిన్నర్ విషయంలో..

రాత్రిపూట ఆలస్యంగా పీకల దాకా భోజనం చేయటం, జీర్ణం కాని పదార్థాలు తినడటం వల్ల గుండె వేగం, శరీర ఉష్ణోగ్రత పెరుగుతాయి. ఇవి నిద్రను దెబ్బతీస్తాయి. కాబట్టి పడుకోవటానికి మూడు గంటల ముందే భోజనం తినాలి. కొవ్వు పదార్థాలకు బదులు తేలికగా జీర్ణమయ్యేవి తినాలి.

టీ, కాఫీకి దూరంగా..

సాయంత్రం వేళల్లో కాఫీ, టీ  ఎక్కువగా తాగేవారికి రాత్రి నిద్ర పట్టడం కష్టమవుతుంది. కూల్ డ్రింకులు, రెడ్ వైన్, చాక్లెట్లు, చీజ్ వంటివి నిద్రకు చేటు చేస్తాయి.