జుట్టు దగ్గర నుండి కాలి గోర్ల వరకు ప్రతిదీ అందంలో భాగమే.. ముఖ్యంగా జుట్టు సంరక్షణ విషయంలో, జుట్టు పెరుగుదల కోసం అమ్మాయిలు చాలా రకాల టిప్స్ ఫాలో అవుతారు. టీవీ యాడ్స్‌లో మోడల్స్ లానూ, హీరోయిన్ల లానూ జుట్టును పట్టు కుచ్చులా మెరిసిపోయేలా చేసుకోవడానికి బోలెడు ప్రొడక్ట్స్ కూడా ఉపయోగిస్తారు.

కానీ వీటి వల్ల అంత ఆశించిన ఫలితం ఉండదు. ఇంట్లో ఉండే వాటితోనే కురులను మృదువుగా, సిల్కీగా మార్చుకో వచ్చు. కిందివాటిలో ఒక్కటి ఫాలో అయినా మంచి ఫలితాలు ఉంటాయి. అవేంటో తెలుసుకుంటే..

బియ్యం నీళ్లు..

బియ్యం నీరు ఈ మధ్య కాలంలో చాలా వైరల్ అవుతోంది. బియ్యాన్ని కొన్ని గంటల పాటు నీటిలో నానబెట్టి ఆ నీటిని వడగట్టి, ఆ నీటితో జుట్టును శుభ్రం చేసుకోవాలి. 10-15 నిమిషాలు దాన్ని అలాగే ఉంచాలి. బియ్యం నీటిలో ఇనోసిటాల్ అనే సమ్మేళనం ఉంటుంది. ఇది దెబ్బ తిన్న జుట్టును రిపేర్ చేస్తుంది. జుట్టును మృదువుగా, స్ట్రైయిట్ గా చేస్తుంది.

పెరుగు, తేనె..

పెరుగును తేనెతో కలపాలి. ఈ మిశ్రమాన్ని జుట్టుకు పట్టింటి మూలాల నుండి చివర్ల వరకు మసాజ్ చేయాలి. 20-30 నిమిషాలు దీన్ని అలాగే ఉంచి ఆ తరువాత గోరువెచ్చని నీటితో శుభ్రం చేసుకోవాలి. ఈ మాస్క్ జుట్టును హేడ్రేట్ చేస్తుంది. మృదువుగా మారుస్తుంది. టెంకాయ పీచులా ఉన్న జుట్టును పట్టుకుచ్చులా మారుస్తుంది.

గుడ్డుతో..

గుడ్డు ఆరోగ్యానికే కాదు సౌందర్య చిట్కాలలో కూడా బాగా ఉపయోగపడుతుంది. రెండు గుడ్లలో ఒక స్పూన్ ఆలివ్ నూనె కలపాలి. ఈ మిశ్రమాన్ని బాగా గిలక్కొట్టి 30 నిమి,ాల పాటూ అలాగే ఉంచాలి. ఆ తరువాత కడిగేయాలి. గుడ్లలో ప్రోటీన్లు పుష్కలంగా ఉంటాయి. ఇవి జుట్టును బలోపేతం చేసి మృదువుగా మార్చడంలో సహాయపడతాయి.

కలబంద..

అలోవెరా జెల్ లో జుట్టు పెరుగుదలను ప్రోత్సహించే.. జుట్టును మృదువుగా ఉంచే ఎంజైమ్ లు ఉంటాయి. తాజా అలోవెరా జెల్ ను తీసి జుట్టుకు అప్లై చెయ్యాలి. 30 నిమిషాల పాటూ దాన్ని అలాగే వదిలేయాలి. అ తరువాత జుట్టును శుభ్రం చేసుకోవాలి. అలోవెరా జెల్ జుట్టును లోతుగా కండిషన్ చేస్తుంది. జుట్టును మృదువుగా ఉంచుతుంది.

అరటి, తేనె..

పండిన అరటిపండును మెత్తగా చేసి తేనెతో కలిపి మాస్క్ తయారుచేసుకోవాలి. దీన్ని జుట్టుకు అప్లై చేసి 30 నిమిషాలు అలాగే ఉంచాలి. ఆ తరువాత జుట్టును శుభ్రం చేసుకోవాలి. ఇది జుట్టును హైడ్రేట్ చేస్తుంది. జుట్టుకు షైనింగ్ ఇస్తుంది.