ప్రభుత్వ కళాశాలలో ఫ్రెషర్స్ పార్టీ సందడి

దౌల్తాబాద్,(విజయక్రాంతి): మండల కేంద్రంలోని ప్రభుత్వ జూనియర్ కళాశాలలో శుక్రవారం సాయంత్రం ఫ్రెషర్స్ పార్టీ ఘనంగా జరిగింది. సీనియర్ విద్యార్థులు కొత్తగా అడుగుపెట్టిన జూనియర్లకు ఆతిథ్యం ఇస్తూ కార్యక్రమాన్ని వైభవంగా నిర్వహించారు. సంగీతం, నృత్యం, నాటికలు, వినోదాత్మక ఆటలతో వేదిక కళకళలాడింది. ప్రిన్సిపాల్, అధ్యాపకులు పాల్గొని విద్యార్థులను అభినందించారు. ఫ్రెషర్స్ తమ ప్రతిభను ప్రదర్శించి అందరి మెప్పు పొందారు. చివరగా డీజే మ్యూజిక్‌తో విద్యార్థులు ఉత్సాహంగా నృత్యం చేసి సందడిని మరింత పెంచారు. సీనియర్స్ జూనియర్స్ మధ్య స్నేహపూర్వక వాతావరణం నెలకొనగా “కలిసి ముందుకు సాగుదాం” అనే సందేశంతో కార్యక్రమం ముగిసింది.