రష్మిక మందన్న, దీక్షిత్ శెట్టి జంటగా నటిస్తున్న చిత్రం ‘ది గర్ల్‌ఫ్రెండ్’. ఈ సినిమాను ప్రముఖ నిర్మాత అల్లు అరవింద్ సమర్పణలో గీతాఆర్ట్స్, ధీరజ్ మొగిలినేని ఎంటర్‌టైన్‌మెంట్ బ్యానర్స్ సంయుక్తంగా నిర్మిస్తున్నాయి. ఇంటెన్స్, ఎమోషనల్ లవ్‌స్టోరీతో దర్శకుడు రాహుల్ రవీంద్రన్ రూపొందిస్తున్నారు. ధీరజ్ మొగిలినేని, విద్య కొప్పినీడి నిర్మాతలుగా వ్యవహస్తున్నారు. సరికొత్త ప్రేమకథగా తెరకెక్కుతున్న ఈ సినిమా ఈ నెల 7న హిందీ, తెలుగు భాషల్లో, ఇదే నెల 14న తమిళ, మలయాళ, కన్నడ భాషల్లో ప్రపంచవ్యాప్తంగా థియేటర్ల ద్వారా ప్రేక్షకుల ముందుకు వస్తోంది. సోమవారం జరిగిన ఇంటర్వ్యూలో హీరో దీక్షిత్ శెట్టి చిత్ర విశేషాలను పంచుకున్నారు. ఆ ముచ్చట్లు ఆయన మాటల్లోనే.. 

‘దసరా’ సినిమా సమయంలో ఇచ్చిన ఇంటర్వ్యూల్లో  నన్ను చూసి దర్శకుడు రాహుల్.. ఈ చిత్రంలో రష్మికకు బాయ్‌ఫ్రెండ్ క్యారెక్టర్‌కు నేను బాగుంటానని నిర్ణయించుకున్నారు. ఆయన పంపిన స్క్రిప్ట్ చదివాక నన్ను ఈ రోల్ కోసం ఎందుకు అనుకుంటున్నారో అర్థమైంది. నేను తెలుగు, తమిళ, మలయాళంలో స్క్రిప్ట్స్ వింటుంటా. ‘ది గర్ల్‌ఫ్రెండ్’ లాంటి స్క్రిప్ట్స్ చాలా అరుదుగా వస్తుంటాయి. అందుకే ఈ సినిమా తప్పకుండా చేయాలనుకున్నా. 

ఈ సినిమాలో విక్రమ్ ఎలా ఉంటాడు.. అతని బాడీ లాంగ్వేజ్ ఏంటి.. ఎలా మాట్లాడతాడు..? అనేది డైరెక్టర్ వివరంగా చెప్పేవారు. ఆయనకు అంత క్లారిటీ ఉండటం వల్ల పర్‌ఫార్మ్ చేయడం నాకు సులువైంది. అనేక లేయర్స్ ఉన్న ఈ పాత్ర కోసం చాలా ప్రిపేర్ అయ్యా. విక్రమ్ క్యారెక్టర్‌లో ఏదో నెగిటివ్ ఉంది.. ఇతను టాక్సిక్ బాయ్‌ఫ్రెండ్ అని ట్రైలర్ రిలీజ్ తర్వాత అందరూ అనుకుంటున్నారు. కానీ, విక్రమ్ నెగిటివ్ క్యారెక్టర్ అనేది ఎప్పుడూ ఫీల్ కావొద్దని రాహుల్ చెప్పేవారు. నేను స్టేజ్, ఫిలిం స్కూల్ బ్యాక్‌గ్రౌండ్ నుంచి వచ్చాను కాబట్టి ఈ పాత్రకు ఎలా సన్నద్ధమవ్వాలో అలా అయ్యాను. ఏ సినిమా చేసినా స్క్రిప్ట్ నాకు పర్సనల్‌గా నచ్చాలనుకుంటా. 

‘ది గర్ల్‌ఫ్రెండ్’ సినిమా ప్రేమకథను మరో కోణంలో చూపిస్తుంది. మనం చూసే కొన్ని సినిమాల్లోని ఫీల్ మనతో పాటే క్యారీ అవుతుంది. అలాంటి సినిమా ఇది. ఈ సినిమాలోని పాత్రలు, సందర్భాలు మన లైఫ్‌లో రిలేట్ చేసుకునేలా ఉంటాయి. 18 నుంచి 25 ఏళ్ల మధ్య వయసున్న యువత ఈ సినిమా చూస్తే తమ జీవితంలో కొన్ని విషయాలు నేర్చుకుంటారు. 

రష్మిక ఈ సినిమా కోసం ఇచ్చిన ఇంటర్వ్యూల్లో ‘ది గర్ల్‌ఫ్రెండ్’ లాంటి సినిమా కొన్నేళ్ల కిందట తాను చూసి ఉంటే తన జీవితం పట్ల తన దృక్పథం మరోలా ఉండేదని చెప్పారు. ఆమె నటన చూసిన తర్వాత ఈ సినిమాకు మరో నాయిక న్యాయం చేయలేదేమో అనిపించింది. ఆమెతో కలిసి నటిస్తున్నప్పుడు ఒక స్టార్‌తో ఉన్నామనే ఫీల్ కలగలేదు. తను చాలా ఫ్రెండ్లీగా యూనిట్ అందరితో ఉండేది. 

కుటుంబ ప్రేక్షకులకు కూడా బాగా నచ్చుతుంది. టాక్సిక్ బాయ్‌ఫ్రెండ్ అంటే స్మోకింగ్, డ్రింకింగ్, యాంగర్ ఇష్యూస్ ఉంటాయని చాలా సినిమాల్లో చూస్తుంటాం. కానీ, టాక్సిక్ బాయ్‌ఫ్రెండ్ అంటే వేరే ఇష్యూస్ కూడా ఉండొచ్చు. అలాంటి ఒక ఎలిమెంట్ మా సినిమాలో చూస్తారు. 

ఈ సినిమా షూటింగ్ టైమ్‌లో అల్లు అరవింద్ ఓసారి నన్ను పిలిచారు. నేను సరిగ్గా నటించడం లేదేమో, ఏమంటారో అని వెళ్లా. కానీ, ఆయన అభినందించి, తర్వాతి సినిమాకు అడ్వాన్స్ ఇచ్చారు. సుదీర్ఘ అనుభవం ఉన్న అలాంటి గొప్ప నిర్మాత నుంచి ప్రశంసలు రావడం, మరో సినిమాకు అడ్వాన్స్ ఇవ్వడం చాలా హ్యాపీగా అనిపించింది. అల్లు అరవింద్ ప్రశంసలు కెరీర్ బిగినింగ్‌లో ఉన్న నాకు ఎంతో ఆత్మవిశ్వాసాన్నిచ్చాయి.

నటుడిగా వైవిధ్యమైన పాత్రల్లో నటించాలని ఉంది. తెలుగులో మంచి అవకాశాలు వస్తున్నాయి. బాగా నటిస్తే ఏ భాషలో నటుడినైనా తెలుగు ప్రేక్షకులు ఆదరిస్తారు. ఈ సినిమా నా కెరీర్‌లో చేసిన బెస్ట్ ఫిలిం అని చెప్పగలను.

నేను కన్నడలో చేసిన ‘బ్యాంక్ ఆఫ్ భాగ్యలక్ష్మి’ సినిమాను తెలుగులో ఈ నెల 21న విడుదల చేయబోతున్నాం. తెలుగులో ‘షబనా’ అనే సినిమా చేస్తున్నా. ఇది కాకుండా ‘కేజేక్యూ’ రిలీజ్‌కు రెడీ అవుతోంది. టైటిల్ ఖరారు కాని మరో ప్రాజెక్టులోనూ నటిస్తున్నా. కన్నడలో శివన్నతో కలిసి ఓ సినిమాలో నటిస్తున్నా. మలయాళంలో చేస్తున్న ‘ఏంజెల్ నెం.16’ రిలీజ్‌కు సిద్ధమవుతోంది. తమిళంలో ఒక సినిమా షూటింగ్‌లో ఉంది.