హైదరాబాద్: మార్చి ప్రథమార్థంలోనే ఎండలు మండుతున్నాయి. తెలంగాణ(Telangana) రాష్ట్రంలో పలు చోట్ల ఉష్ణోగ్రతలు(Temperatures) 40 డిగ్రీలు దాటాయి. ఉష్ణోగ్రతలు పెరిగిపోవడంతో ప్రజలు అల్లాడిపోతున్నారు. గత సంవత్సరం కంటే ఈ ఏడాది అధిక ఉష్ణోగ్రతలు నమోదవుతాయని వాతావరణ శాఖ హెచ్చరించింది. చిన్న పిల్లలు, వృద్ధులు అప్రమత్తంగా ఉండాలని అధికారులు సూచించారు.

తెలంగాణలో శుక్రవారం అనేక జిల్లాల్లో 40°C, 41°C మధ్య ఉష్ణోగ్రతలు నమోదయ్యాయి. ఖమ్మం, మహబూబాబాద్, భద్రాద్రి కొత్తగూడెం, ములుగు, మంచిర్యాల, కుమురం భీమ్ ఆసిఫాబాద్, ఆదిలాబాద్, జగిత్యాల సహా రాష్ట్రంలోని తూర్పు, ఉత్తర ప్రాంతాలలో అత్యధిక ఉష్ణోగ్రతలు నమోదయ్యాయి. హైదరాబాద్‌లో కూడా తీవ్రమైన వేడి నమోదైంది. మార్చి 8-11 మధ్య వేడి నుండి కొంచెం ఉపశమనం లభించే అవకాశం ఉందని అధికారులు తెలిపారు. మార్చి 12 నుండి మార్చి 15 వరకు ఉష్ణోగ్రతలు మళ్లీ పెరిగే అవకాశం ఉంది. మార్చి 16 తర్వాత వాతావరణ పరిస్థితులు మారవచ్చు, రాష్ట్రంలోని కొన్ని ప్రాంతాల్లో అకాల వర్షాలు, ఉరుములతో కూడిన వర్షాలు కురిసే అవకాశం ఉందని అంచనాలు సూచిస్తున్నాయి. రాబోయే రోజుల్లో ఎండల నుంచి జాగ్రత్తలు తీసుకోవాలని, వాతావరణ హెచ్చరికలపై అప్రమత్తంగా ఉండాలని అధికారులు సూచించారు.