ఇండిగో కష్టాలు

హైదరాబాద్: ఇండిగో(IndiGo Flight Disruptions) శుక్రవారం వివిధ విమానాశ్రయాలలో 400కి పైగా విమానాలను రద్దు చేసి, పలు విమానాలు ఆలస్యంగా నడిచాయని పేర్కొంది. విమానాలు చాలా సేపు ఆలస్యం కావడంతో వందలాది మంది ప్రయాణికులు విమానాశ్రయాలలో ఇబ్బందులు ఎదుర్కొన్నారు. ఢిల్లీ విమానాశ్రయంలో బయలుదేరే, రాకపోకలు సహా 220కి పైగా విమానాలు రద్దు చేయగా, బెంగళూరు విమానాశ్రయంలో 100 కి పైగా విమానాలు రద్దు చేయబడ్డాయని ఆ వర్గాలు మీడియాకి తెలిపాయి.

హైదరాబాద్ విమానాశ్రయంలో 90కి పైగా విమానాలు రద్దు చేయబడినట్లు వర్గాలు తెలిపాయి. ఇతర విమానాశ్రయాలలో కూడా రద్దులు జరిగాయి. చాలా విమానాలు ఆలస్యం అయ్యాయి. క్యాబిన్ సిబ్బంది ఇబ్బందులు, ఇతర కారణాల వల్ల ఇండిగో నిర్వహణ అంతరాయాలతో సతమతమవుతోంది. గత కొన్ని రోజులుగా కొనసాగుతున్న ఇండిగో విమానాల అంతరాయాలకు సంబంధించిన పరిస్థితిని పౌర విమానయాన మంత్రిత్వ శాఖ, డైరెక్టరేట్ జనరల్ ఆఫ్ సివిల్ ఏవియేషన్ (Directorate General of Civil Aviation) నిశితంగా పరిశీలిస్తున్నాయి. గురువారం, ఇండిగో విమానయాన నియంత్రణ సంస్థ డీజీసీఏకి, ఫిబ్రవరి 10, 2026 నాటికి విమాన కార్యకలాపాలు పూర్తిగా స్థిరీకరించబడతాయని అంచనా వేసింది.