హైదరాబాద్: హైదరాబాద్‌కు వెళ్లాల్సిన ఇండిగో విమానంలో(Indigo flight) సాంకేతిక లోపం తలెత్తడంతో తిరుపతికి తిరిగి రావాల్సి వచ్చిందని అధికారులు సోమవారం తెలిపారు. ఆదివారం హైదరాబాద్ వెళ్తున్న ఇండిగో విమానంలో సాంకేతిక లోపం తలెత్తి దాదాపు 40 నిమిషాల పాటు గాల్లో చక్కర్లు కొట్టి తిరుపతికి సురక్షితంగా తిరిగి వచ్చింది. ఎయిర్‌బస్ A321neo విమానం తిరుపతి(Tirupati) విమానాశ్రయం నుండి సాయంత్రం 7:42 గంటలకు బయలుదేరి 8:34 గంటలకు తిరిగి వచ్చిందని ఎయిర్ ట్రాఫిక్ ట్రాకింగ్ వెబ్‌సైట్ Flightradar24 తెలిపింది. 

Flightradar24 లోని విమాన మార్గంలో 6E 6591 విమానం తిరుపతిలోని వెంకటగిరి పట్టణానికి చేరుకుని, యూ-టర్న్ తీసుకున్నట్లు చూపించింది. ఆ తర్వాత అది దాదాపు 40 నిమిషాల పాటు గాలిలో తిరుగుతూ తిరుపతి విమానాశ్రయానికి తిరిగి వచ్చింది. ఇండిగో వెబ్‌సైట్ ప్రకారం, ఈ విమానం తిరుపతి నుండి రాత్రి 7:20 గంటలకు బయలుదేరి రాత్రి 8:30 గంటలకు హైదరాబాద్ చేరుకుంటుంది. ఆ రోజు హైదరాబాద్‌కు వెళ్లాల్సిన చివరి విమానం ఇదేనని తెలుస్తోంది. కానీ ఆ తర్వాత ఆ విమానం రద్దు చేయబడింది. సోషల్ మీడియాలో(Social media) ఉన్న ఒక వీడియోలో ప్రయాణీకులు రీషెడ్యూల్ గురించి ఎయిర్‌లైన్ సిబ్బందితో వాదిస్తున్నట్లు కనిపించింది. ఈ సంఘటనపై విమానయాన సంస్థ ఇప్పటివరకు అధికారిక ప్రకటన విడుదల చేయలేదు.