హైదరాబాద్: ఎంతో ప్రచారంలో ఉన్న "ఫ్యూచర్ సిటీ" ప్రాజెక్టుకు భవిష్యత్తు లేదని బీఆర్ఎస్ వర్కింగ్ ప్రెసిడెంట్ కేటీఆర్(BRS Working President KTR) అన్నారు. తన కుటుంబం, స్నేహితుల ప్రయోజనం కోసం హైదరాబాద్ ఫార్మా సిటీ భూములను రియల్ ఎస్టేట్ వెంచర్‌గా మార్చాలనే ముఖ్యమంత్రి రేవంత్ రెడ్డి(CM Revanth Reddy) ఆశయం నెరవేరదని పేర్కొన్నారు. కేసీఆర్ ప్రభుత్వం ప్రారంభించిన 56 గ్రామాలలో విస్తరించి ఉన్న 20,000 ఎకరాల ఫార్మా సిటీ ప్రాజెక్టును కాంగ్రెస్ ప్రభుత్వం రద్దు చేయడాన్ని కేటీఆర్ ఖండించారు. రాష్ట్ర పారిశ్రామిక వృద్ధి కోసం రైతులు స్వచ్ఛందంగా తమ భూమిని విడిచిపెట్టారని.. కానీ ఇప్పుడు మోసపోతున్నారని తెలిపారు. "ప్రతి ఎకరాన్ని రైతులకు తిరిగి ఇస్తామని కాంగ్రెస్ హామీ ఇచ్చింది. బదులుగా, 'ఫ్యూచర్ సిటీ' ముసుగులో ఈ భూములను రియల్ ఎస్టేట్ కోసం చూస్తోంది" అని ఆయన అన్నారు.

ఫార్మా కంపెనీలకు కేటాయించిన భూముల భవితవ్యంపై ఆందోళన వ్యక్తం చేశారు. రేవంత్ రెడ్డి దృష్టి లేని నాయకుడని, అతని నిర్ణయాలు ప్రజాధనాన్ని వృధా చేయడానికి దారితీస్తాయని కేటీఆర్ అన్నారు. "ఒక తెలివితక్కువ నాయకుడు రాష్ట్రాన్ని పరిపాలించినప్పుడు ఏమి జరుగుతుందో దానికి ఇది ఒక అద్భుతమైన ఉదాహరణ" అని తెలిపారు. 2013 భూసేకరణ చట్టాన్ని ఉటంకిస్తూ, ఒక నిర్దిష్ట ప్రజా ప్రయోజనం కోసం సేకరించిన భూమిని ప్రైవేట్ వ్యాపార ప్రయోజనాల కోసం మళ్లించలేమని కేటీఆర్ గుర్తు చేశారు. రెండు సంవత్సరాల క్రితం అసెంబ్లీలో కాంగ్రెస్‌ను హెచ్చరించిన విషయాన్ని కూడా ఆయన గుర్తు చేసుకున్నారు. 

“PR బ్లిట్జ్ కోసం వందల కోట్లు ఖర్చు చేసిన తర్వాత, నేడు అధికారులు కూడా తీవ్రమైన చట్టపరమైన అడ్డంకులను అంగీకరిస్తున్నారు” అని, ఫార్మా సిటీ ప్రాజెక్ట్ కోసం గత బీఆర్ఎస్ ప్రభుత్వం కోట్లాది ప్రజాధనంతో మౌలిక సదుపాయాలను అభివృద్ధి చేసిందని, కానీ దానిని పక్కన పెట్టిందని ఆయన అన్నారు. “ప్రజా ధనాన్ని వృధా చేశారు, రైతులను మోసం చేశారు, పౌరులను మోసగించారు” అని విమర్శించారు. ప్రభుత్వ చర్యలు ప్రజా ప్రయోజనానికి విరుద్ధమని.. ప్రజలకు, ముఖ్యంగా రైతులకు హాని కలిగిస్తాయని హెచ్చరించారు. ప్రభుత్వం నుండి తక్షణ స్పష్టత కోరుతూ, రేవంత్ రెడ్డి స్పందించకపోతే, వారి భూములను, భవిష్యత్తును కాపాడుకోవడానికి బీఆర్ఎస్ రైతుల తరపున పోరాడుతుందని కేటీఆర్ హెచ్చరించారు.