మాదాపూర్‌లో మళ్లీ తలెత్తిన భూవివాదం

అయ్యప్ప సొసైటీ పరిధిలో సర్వే నం 11/37పై రెండు వర్గాల మధ్య ఘర్షణ

శేరిలింగంపల్లి, ఆగస్టు 26 (విజయక్రాంతి): ఐటీ కారిడార్లోని మాదాపూర్లో అయ్యప్ప సొసైటీ పరిధిలోని ఖానామెట్ సర్వే నంబర్ 11/37 భూమిపై మళ్లీ వివాదం చెలరేగింది. భూమి తమదేనని బీఆర్‌ఎస్ ఎమ్మెల్సీ కె. నవీన్రావు వర్గం వాదిస్తుండగా, మరో వర్గం తమకు కూడా హక్కులున్నాయని చెబుతోంది. దీంతో పరిస్థితి ఉద్రిక్తంగా మారింది.

బుధవారం ఉదయం మైఖేల్రెడ్డి అనే వ్యక్తి స్థలం చుట్టూ ఇనుప రేకులు ఏర్పాటు చేయించడం మొదలుపెట్టగా, ఎమ్మెల్సీ వర్గానికి చెందిన వ్యక్తులు అడ్డుకున్నారు. ఇరువర్గాల మధ్య వాగ్వాదం జరిగి కొద్దిసేపు ఉద్రిక్త పరిస్థితులు నెలకొన్నాయి. సమాచారం అందుకున్న మాదాపూర్ పోలీసులు ఘటనా స్థలానికి చేరుకుని పరిస్థితిని అదుపులోకి తీసుకువచ్చారు.మైఖేల్రెడ్డి వర్గం తాము ఏకపక్షంగా స్థలంలోకి ప్రవేశించలేదని, ముందుగా భూమిని సర్వే చేయించిన తర్వాతే హద్దులు గుర్తించి ఇనుప రేకులు ఏర్పాటు చేస్తున్నామని చెబుతోంది.

అయితే ఆ సర్వేను ఎవరు నిర్వహించారు, రెవెన్యూ అధికారుల సమక్షంలో జరిగిందా, సర్వేకు ముందు మరో వర్గానికి నోటీసులు ఇచ్చారా అనే ప్రశ్నలకు స్పష్టమైన సమాధానాలు రాలేదు.ఈ భూమికి సంబంధించి గతంలోనూ ఇలాంటి వివాదం చోటుచేసుకున్నట్లు సమాచారం. కోకాపేట్కు చెందిన కొందరు వ్యక్తులు స్థలంపై తమకు హక్కులున్నాయని అప్పట్లో పేర్కొనగా, ఎమ్మెల్సీ నవీన్రావు వర్గం కూడా భూమి తమదేనని వాదించింది. అప్పట్లో ఇరువర్గాల మధ్య వాగ్వాదం జరిగినప్పటికీ వివాదానికి శాశ్వత పరిష్కారం లభించలేదు.తాజా ఘటన అనంతరం కోకాపేట్ వర్గం మాదాపూర్ పోలీస్స్టేషన్కు వెళ్లి సీఐతో మాట్లాడినట్లు తెలుస్తోంది.

అయితే ఘటనపై ఎవరు ఫిర్యాదు చేశారు, కేసు నమోదైందా, లేక రెవెన్యూ అధికారుల సమక్షంలో పత్రాలను పరిశీలించాలని సూచించారా అనే విషయాలపై పోలీసుల అధికారిక ప్రకటన ఇంకా రాలేదు.విలువైన భూమిపై రెండు వర్గాలు నిలబడటంతో ఈ వివాదం చర్చనీయాంశమైంది. రెండు వర్గాలు చూపుతున్న సేల్డీడ్లు, లింక్ డాక్యుమెంట్లు, ఎన్కంబరెన్స్ సర్టిఫికెట్లు, మ్యుటేషన్ రికార్డులు, సర్వే మ్యాప్, టిప్పన్, కోర్టు ఉత్తర్వులను అధికారులు పరిశీలించాల్సిన అవసరం ఉంది.

సర్వే నంబర్ 11/37లో మొత్తం విస్తీర్ణం ఎంత? ప్రస్తుతం వివాదంలో ఉన్న స్థలం ఎంత? రెవెన్యూ రికార్డుల్లో యజమానిగా ఎవరి పేరు ఉంది? భూమిపై కోర్టు స్టేటస్కో లేదా ఇతర ఆంక్షలు ఉన్నాయా? ఇనుప రేకులు ఏర్పాటు చేయడానికి అనుమతి ఎవరు ఇచ్చారు? అనే ప్రశ్నలకు అధికారులు సమాధానం చెప్పాలి.ఖానామెట్, అయ్యప్ప సొసైటీ ప్రాంతాల్లో భూములకు సంబంధించిన వివాదాలు గతంలోనూ న్యాయస్థానాల వరకు వెళ్లాయి.

ఈ నేపథ్యంలో పోలీసు బందోబస్తుతో అధికారిక రీ-సర్వే నిర్వహించి, ఇరువర్గాల పత్రాలను పరిశీలించి నిజమైన హక్కుదారులు ఎవరో తేల్చాలని స్థానికులు కోరుతున్నారు.భూమి ఎవరిదన్నది రాజకీయ బలం లేదా క్షేత్రస్థాయి బలప్రదర్శనతో కాకుండా అధికారిక రికార్డులు, చట్టబద్ధమైన పత్రాల ఆధారంగానే నిర్ణయించాలి. లేదంటే కోట్ల విలువైన ఖానామెట్ భూముల చుట్టూ ఇలాంటి ఘర్షణలు మళ్లీ మళ్లీ తలెత్తే ప్రమాదం ఉందని స్థానికులు ఆందోళన వ్యక్తం చేస్తున్నారు.