బాలకృష్ణకు జీవన సాఫల్య పురస్కారం

టాలీవుడ్ నటుడు నందమూరి బాలకృష్ణకు మరో అరుదైన గౌరవం దక్కింది. ‘ఇంటర్నేషనల్ ఫిల్మ్ ఫెస్టివల్ ఢిల్లీ’ (ఐఎఫ్‌ఎఫ్‌డీ) నుంచి ఆయన లైఫ్ టైమ్ అచీవ్‌మెంట్ అవార్డు (జీవన సాఫల్య పురస్కారం)ను అందుకున్నారు. బాలకృష్ణ దశాబ్దాలుగా సినిమా రంగానికి చేసిన సేవలకు గాను ఈ గుర్తింపు దక్కింది. బుధవారం సాయ్రంతం దేశ రాజధానిలోని భారత్ మండపంలో ప్రారంభమైన ఈ ఐఎఫ్‌ఎఫ్‌డీ-2026 వేడుకల్లో ఆయన ఈ అవార్డును అందుకున్నారు.

ఇదే వేదికపై అలనాటి నటి షర్మిలా ఠాగూర్, దివంగత లెజెండరీ నటుడు ధర్మేంద్ర (ఆయన తరపున కుటుంబసభ్యులు)ను కూడా లైఫ్‌టైమ్ అచీవ్‌మెంట్ అవార్డుతో గౌరవించారు. ముఖ్యమంత్రి రేఖాగుప్తా చేతుల మీదుగా వీరంతా అవార్డులు అందుకొన్నారు. అంతకుముందు ముఖ్యమంత్రి రేఖా గుప్తాతోపాటు మంత్రులు కపిల్ మిశ్రా, పర్వేశ్ సాహిబ్ సింగ్ వర్మ, నటీమణులు హేమమాలిని, కంగనా రనౌత్, షర్మిలా ఠాగూర్‌లు జ్యోతి ప్రజ్వలన చేసి ఈ ఉత్సవాలను అధికారికంగా ప్రారంభించారు.

ఢిల్లీ పర్యాటక, రవాణా అభివృద్ధి సంస్థ ఆధ్వర్యంలో జరుగుతున్న ఈ చలనచిత్ర ఉత్సవాలు మార్చి 31 వరకు కొనసాగనున్నాయి. వివిధ భాషా చిత్రాలను ఈ వేడుకలో ప్రదర్శించనున్నారు. ఇక బాలకృష్ణకు లైఫ్ టైమ్ అచీవ్‌మెంట్ అవార్డు లభించడం పట్ల తెలుగు ఫిలం ప్రొడ్యూసర్స్ కౌన్సిల్ హర్షం వ్యక్తం చేసింది.