హైదరాబాద్: బెట్టింగ్ యాప్ కేసుకు సంబంధించి తన వాంగ్మూలాన్ని నమోదు చేయడానికి నటి, నిర్మాత, టెలివిజన్ ప్రముఖురాలు మంచు లక్ష్మి(Lakshmi Manchu) ప్రసన్న బుధవారం ఎన్‌ఫోర్స్‌మెంట్ డైరెక్టరేట్ (Enforcement Directorate) ముందు హాజరు కానున్నారు. ఇటీవల బెట్టింగ్ యాప్‌లను ప్రోత్సహించిన సినీ ప్రముఖులకు నోటీసులు జారీ చేసిన ఈడీ, బషీర్‌బాగ్‌లోని ఈడీ జోనల్ కార్యాలయంలో దర్యాప్తు బృందం ముందు హాజరు కావాలని మంచు లక్ష్మికి కూడా నోటీసులు పంపింది. 

గతంలో బెట్టింగ్ యాప్‌కు సంబంధించిన ప్రకటనలో నటించిన మంచు లక్ష్మిపై బెట్టింగ్‌ను ప్రోత్సహించినందుకు సైబరాబాద్ పోలీసులు(Cyberabad Police) ఇతర ప్రముఖ నటులతో పాటు కేసు నమోదు చేసిన విషయం తెలిసిందే. ఎఫ్‌ఐఆర్((First Information Report)) ఆధారంగా ఈ విషయంపై ఈడీ సమాంతర దర్యాప్తు ప్రారంభించింది. సినీ ప్రముఖులు బెట్టింగ్ యాప్‌లను ప్రమోట్ చేయడం వల్ల చాలా మంది ఆకర్షితులయ్యారని, దీనివల్ల వారు భారీ ఆర్థిక నష్టాలను చవిచూశారని, కొందరు తమ జీవితాలను కూడా ముగించుకున్నారని ఆరోపణలు ఉన్నాయి. ఈడీ ఇప్పటివరకు 36 మంది సినీ ప్రముఖులకు నోటీసులు పంపింది. ఈ కేసుకు సంబంధించి సీనియర్ నటుడు ప్రకాష్ రాజ్, విజయ్ దేవరకొండ(Vijay Deverakonda), రానా దగ్గుబాటి ఇప్పటికే ఈడీ అధికారుల ముందు హాజరై వారి వాంగ్మూలాలను నమోదు చేశారు.