నవ దంపతులను కాటేసిన మృత్యువు

హైదరాబాద్: ఆంధ్రప్రదేశ్‌కు చెందిన నూతన వధూవరులు(Newly Married Couple) శుక్రవారం వంగపల్లి, ఆలేరు రైల్వే స్టేషన్ల మధ్య మచిలీపట్నం ఎక్స్‌ప్రెస్ రైలు నుండి ప్రమాదవశాత్తు కిందపడి మృతి చెందారు. బాధితులను కె. సింహాచలం (25), అతని భార్య భవాని (19)గా గుర్తించారు. ఈ దంపతులు ఆంధ్రప్రదేశ్‌లోని పార్వతీపురం మన్యం జిల్లా, రవుపల్లి గ్రామానికి చెందినవారు. వారికి రెండు నెలల క్రితమే వివాహం జరిగింది.

హైదరాబాద్‌లోని ఒక కెమికల్ ఫ్యాక్టరీలో పనిచేసే సింహాచలారం, జగద్గిరిగుట్టలోని గాంధీనగర్‌లో నివసిస్తున్నాడు. విజయవాడలో ఉన్న తమ బంధువులను కలవడానికి ఈ దంపతులు గురువారం రాత్రి సికింద్రాబాద్‌లో రైలు ఎక్కారు. వారు తలుపు దగ్గర నిలబడి ఉండగా, ప్రమాదవశాత్తు అక్కడి నుండి జారిపడి వంగపల్లి సమీపంలో మరణించారు. శుక్రవారం నాడు ట్రాక్‌మెన్‌లు మృతదేహాలను గమనించి పోలీసులకు సమాచారం అందించారు. ఈ ఘటనపై కేసు నమోదు చేసుకున్న పోలీసులు మృతదేహాలను స్వాధీనం చేసుకుని పోస్టుమార్టం నిమిత్తం మార్చురీకి తరలించారు.