హైదరాబాద్: సికింద్రాబాద్‌లో ఓ మైనర్ బాలికపై లైంగిక దాడికి పాల్పడిన కేసులో నాంపల్లిలోని స్థానిక కోర్టు 44 ఏళ్ల సెక్యూరిటీ గార్డుకు 25 ఏళ్ల కఠిన కారాగార శిక్ష విధించింది. సికింద్రాబాద్‌లోని(Secunderabad) ఒక వాణిజ్య సముదాయంలో సెక్యూరిటీ గార్డుగా పనిచేస్తున్న, బీహార్‌కు చెందిన అర్జున్ కుమార్ ఝా అలియాస్ అర్జున్ పాండే అనే నిందితుడిపై కోర్టు రూ.20,000 జరిమానా కూడా విధించింది. ఫిర్యాదుదారురాలు తన భర్తతో కలిసి అర్జున్ సెక్యూరిటీ గార్డుగా పనిచేస్తున్న అదే కాంప్లెక్స్‌లో నివసిస్తున్నట్లు తెలిపారు.

అక్టోబర్ 26, 2024న నిందితుడు తన మైనర్ కుమార్తెను బలవంతంగా వాణిజ్య సముదాయంలోని నాల్గవ అంతస్తుకు తీసుకెళ్లి, ఆమెపై దాడి చేసి అత్యాచారం చేశాడని ఫిర్యాదుదారురాలు పేర్కొంది. బాలిక కేకలు విన్న కుటుంబ సభ్యులు, కాంప్లెక్స్‌లోని ఇతర నివాసితులు సంఘటనా స్థలానికి చేరుకుని బాధితురాలిని రక్షించి నిందితుడిని అరెస్టు చేశారు. దర్యాప్తులో భాగంగా పోలీసులు అవసరమైన శాస్త్రీయ, వైద్య, డాక్యుమెంటరీ ఆధారాలను సేకరించి, సాక్షులను పరిశీలించిన తర్వాత సంబంధిత కోర్టు ముందు చార్జిషీట్ దాఖలు చేశారు. 

వివరణాత్మక విచారణ ప్రక్రియల తర్వాత, XII అదనపు సెషన్స్ జడ్జి, టి. అనిత నిందితుడిని బీఎన్ఎస్,  పోక్సో చట్టం(POCSO), ఎస్సీ , ఎస్టీ చట్టంలోని సంబంధిత నిబంధనల కింద దోషిగా నిర్ధారించి, 25 సంవత్సరాల ఆర్ఐ జైలు శిక్ష విధించారు. బాధితురాలికి కోర్టు రూ.2 లక్షల పరిహారం ప్రకటించింది. లైంగిక నేరాల బాధితులకు, ముఖ్యంగా మైనర్లకు న్యాయం జరిగేలా హైదరాబాద్ పోలీసుల వేగవంతమైన దర్యాప్తు, సమర్థవంతమైన ప్రాసిక్యూషన్, నిబద్ధతను ఈ శిక్ష ప్రతిబింబిస్తుందని నార్త్ జోన్ డిప్యూటీ కమిషనర్ ఆఫ్ పోలీస్ ఎస్. రష్మి పెరుమాళ్ పేర్కొన్నారు.