ఇటానగర్: ప్రధానమంత్రి నరేంద్ర మోడీ(PM Narendra Modi) ఒకరోజు పర్యటన కోసం అరుణాచల్ ప్రదేశ్( Arunachal Pradesh) చేరుకున్నారు. హోలోంగిలోని డోన్యి పోలో విమానాశ్రయంలో దిగిన తర్వాత, ఆయన హెలికాప్టర్‌లో ఇటానగర్‌లోని రాజ్ భవన్‌కు చేరుకున్నారని అధికారులు తెలిపారు. గవర్నర్ కెటి పర్నాయక్, ముఖ్యమంత్రి పెమా ఖండు  రాజ్ భవన్ హెలిప్యాడ్‌లో ఆయనకు స్వాగతం పలికారు. ఈ పర్యటన సందర్భంగా ప్రధానమంత్రి రూ.5,000 కోట్లకు పైగా విలువైన మౌలిక సదుపాయాల ప్రాజెక్టులను ప్రారంభిస్తారు. వీటిలో షి యోమి జిల్లాలో రెండు ప్రధాన జలవిద్యుత్ ప్రాజెక్టులు, తవాంగ్‌లోని ఒక కన్వెన్షన్ సెంటర్ ఉన్నాయి. ప్రధాని మోదీ ఇందిరా గాంధీ పార్క్ నుండి ర్యాలీలో ప్రసంగిస్తూ ఈ ప్రాజెక్టులను వర్చువల్‌గా ప్రారంభిస్తారు. రూ.3,700 కోట్లకు పైగా విలువైన హియో హైడ్రో ఎలక్ట్రిక్ (240 మెగావాట్లు), టాటో-ఐ హైడ్రో ఎలక్ట్రిక్ (186 మెగావాట్లు) అనే జలవిద్యుత్ ప్రాజెక్టులను సియోమ్ సబ్-బేసిన్‌లో అభివృద్ధి చేసి ఈ ప్రాంతం జలవిద్యుత్ సామర్థ్యాన్ని ఉపయోగించుకుంటారు.