న్యూఢిల్లీ: విశాఖలో భారత నావికాదళం కోసం రక్షణ మంత్రి రాజ్‌నాథ్ సింగ్(Defence Minister Rajnath Singh) మంగళవారం రెండు అత్యాధునిక మల్టీ-మిషన్ స్టెల్త్ ఫ్రిగేట్‌లు, ఐఎన్ఎస్, ఉదయగిరి, ఐఎన్ఎస్ హిమగిరిలను ప్రారంభించారు. రెండు యుద్ధ నౌకలు ఒకేసారి జాతికి అంకితం చేయడం ఇదే మొదటి సారి అన్నారు. ఆత్మనిర్భర్ భారత్  కి ఈ రెండు నౌకలు నిదర్శనమని రాజ్ నాథ్ సింగ్ అన్నారు. స్వదేశీ యుద్ధనౌక సామర్థ్యానికి ఈ నౌకలు ప్రతీక అన్నారు. రెండు నౌకలు బహుళ పాత్రల పోషించనున్నాయని తెలిపారు. సాంకేతిక పరిజ్ఞానం ఈ నౌకల తయారీలో ప్రతిబింబిస్తోందని చెప్పారు. 2050 నాటికి 200 యుద్ధనౌకలు నిర్మాణం చేపట్టనున్నట్లు పేర్కొన్నారు. ఆపరేషన్ సిందూర్ ఇంకా ముగియలేదని రక్షణమంత్రి స్పష్టం చేశారు.

రెండు యుద్ధ నౌకలు భారతదేశ నావికా సామర్థ్యాలను మరింత పెంచాయని స్పష్టం చేశారు. ఈ ప్రారంభోత్సవాన్ని స్వావలంబన భారతదేశం కల సాకారం కావడానికి ఒక చిత్రంగా అభివర్ణించిన రాజ్‌నాథ్ సింగ్ ఇది తమ దార్శనికత, నిబద్ధతకు నిదర్శనం అన్నారు. భారత నావికాదళం ఒకే రోజు రెండు వేర్వేరు షిప్‌యార్డ్‌లలో నిర్మించిన రెండు ఫ్రంట్‌లైన్ సర్ఫేస్ కంబాటెంట్‌లను(Frontline Surface Combatant) కమిషన్ చేయడం ఇదే మొదటిసారి. డ్యూయల్ కమిషన్ భారతదేశ తూర్పు సముద్ర తీరం వ్యూహాత్మక ప్రాముఖ్యతను, దేశంలోని రెండు ప్రధాన రక్షణ షిప్‌యార్డ్‌ల మధ్య విజయవంతమైన సహకారాన్ని హైలైట్ చేస్తుంది. "ఐఎన్ఎస్ ఉదయగిరి, ఐఎన్ఎస్ హిమగిరి ఈరోజు విశాఖపట్నం నుండి ప్రారంభిస్తున్న ప్రయాణం భారతదేశం గర్వించదగ్గ ప్రయాణం. ఈ ఆరంభం మనందరికీ గర్వకారణం" అని రాజ్ నాథ్ సింగ్ పేర్కొన్నారు.

ఉదయగిరి, హిమగిరి అనేవి ప్రాజెక్ట్ 17Aకి చెందిన తాజా నౌకలు, ఇవి ప్రాజెక్ట్ 17 (శివాలిక్) తరగతి యుద్ధనౌకల వారసత్వంపై నిర్మించబడ్డాయి. అవి డిజైన్, స్టెల్త్ టెక్నాలజీ,  ఆయుధం, సెన్సార్ వ్యవస్థలలో గణనీయమైన పురోగతిని కలిగి ఉన్నాయి. ఇవి బ్లూ వాటర్ పరిస్థితులలో సముద్ర కార్యకలాపాల పూర్తి స్పెక్ట్రమ్‌ను అమలు చేయగలవని ఆయన తెలిపారు. ఈ నౌకల్లో ఆధునిక కంబైన్డ్ డీజిల్ లేదా గ్యాస్ (Combined Diesel Or Gas propulsion system) ప్రొపల్షన్ ప్లాంట్లు, అత్యాధునిక ఇంటిగ్రేటెడ్ ప్లాట్‌ఫామ్ మేనేజ్‌మెంట్ సిస్టమ్, అధునాతన స్వదేశీ ఆయుధాలు, సెన్సార్ల సూట్ ఉన్నాయన్నారు. భారత నావికాదళాన్ని "భారతదేశ సముద్ర బలానికి శక్తివంతమైన చిహ్నం" అని అభివర్ణించిన రక్షణమంత్రి, జాతీయ భద్రతలోనే కాకుండా ఆర్థిక స్థిరత్వంలో కూడా దాని పాత్ర కీలకమని ముగించారు. "మన ఇంధన అవసరాలు మన సముద్ర మార్గాల భద్రతపై ఆధారపడి ఉంటాయి. నావికాదళం కేవలం గస్తీ తిరగడం మాత్రమే కాదు. ఇది మన జాతీయ ఆర్థిక భద్రతకు మూలస్తంభం" అని రాజ్‌నాథ్ సింగ్ అన్నారు.