పరుగు దూరంలో..

పోరాడి ఓడిన బెంగళూరు,  జాక్స్, రజత్ పోరాటం వృథా, కోల్‌కతా పాంచ్ పటాకా

బెంగళూరు విజయానికి 12 బంతుల్లో 31 పరుగులు 

చేయాల్సిన దశలో దినేశ్ కార్తీక్ 4,6 కొట్టి ఔట్ కాగా.. ఆఖరి ఓవర్‌లో ఆర్సీబీ విజయ సమీకరణం 6 బంతుల్లో 21 పరుగులుగా మారింది. ఈ దశలో సీనియర్ స్పిన్నర్ కరణ్ శర్మ అదరగొట్టాడు. ఐపీఎల్లో అత్యధిక ధర పెట్టి కొనుగోలు చేసుకున్న స్టార్క్ బౌలింగ్‌ను రఫ్ఫాడించాడు. తొలి నాలుగు బంతుల్లో మూడు సిక్సర్లు బాదడంతో.. ఇక రెండు బంతుల్లో మూడు పరుగులు చేస్తే బెంగళూరు గెలిచేసేదే కానీ.. ఈ దశలో ఒత్తిడికి గురైన చాలెంజర్స్..  విజయానికి పరుగు దూరంలో నిలిచిపోయింది.  బెంగళూరుకు ఐపీఎల్లో ఏదీ కలిసి రావడం లేదు. 

ప్లే ఆఫ్స్ అవకాశాలు మెరుగు పర్చుకోవాలంటే తప్పక నెగ్గాల్సిన మ్యాచ్‌లో పరుగు తేడాతో పరాజయం పాలైంది. ఉత్కంఠ ఊపేసిన పోరులో స్టార్లు విఫలమైనా అనూహ్యంగా పుంజుకున్న బెంగళూరు.. చివరి బంతికి బోల్తా కొట్టింది. సీజన్‌లో ఇప్పటికే ఎనిమిది మ్యాచ్‌లు ఆడిన బెంగళూరు ఏడింట ఓడింది. ఇక ఇక్కడి నుంచి డుప్లెసిస్ సేన ప్లే ఆఫ్స్ చేరాలంటే అద్భుతం జరగాల్సిందే! 

సన్‌రైజర్స్ పవర్‌ప్లే బాదుడు చూసిన ప్రతి జట్టు.. తొలి ఆరు ఓవర్లలో దంచికొట్టడమే పరమావధిగా పెట్టుకొని ముందుకు సాగుతున్నట్లు కనిపిస్తోంది. తాజా పోరులో కోల్‌కతా ఓపెనర్ ఫిల్‌సాల్ట్ కూడా పూనకం వచ్చినవాడిలా బెంగళూరు బౌలర్లపై విరుచుకుపడ్డాడు. కేవలం 14 బంతుల్లో 48 పరుగులు చేయగా.. కెప్టెన్ శ్రేయస్ అయ్యర్, రస్సెల్ రాణించడంతో కోల్‌కతా భారీ స్కోరు చేసింది. ఛేదనలో చేజ్‌మాస్టర్ విరాట్ కోహ్లీ సందేహాస్పద నిర్ణయానికి వెనుదిరగగా.. విల్ జాక్స్, రజత్ పాటిదార్ పోరాడినా ఫలితం లేకపోయింది.