ప‌టాన్ చెరు: హైదరాబాదులోని గీతం స్కూల్ ఆఫ్ టెక్నాలజీ(Gitam School of Technology) కంప్యూటర్ సైన్స్ అండ్ ఇంజనీరింగ్(CSE) విభాగం పరిశోధక విద్యార్థిని యర్రారపు శ్రావణిదేవి డాక్టరేట్ కు అర్హత సాధించారు. ‘డేటా ఆగ్మెంటేషన్, ట్రాన్స్ఫర్ లెర్నింగ్ టెక్నిక్ లను ఉపయోగించి రెటీనా ఇమేజ్ సింథసిస్, వర్గీకరణ’ పై ఆమె అధ్యయనం చేసి, సిద్ధాంత వ్యాసాన్ని సమర్పించారు. ఈ పరిశోధనకు మార్గదర్శనం వహిస్తున్న గీతం స్కూల్ ఆఫ్ టెక్నాలజీ సీఎస్ఈ విభాగం ప్రొఫెసర్ డాక్టర్ ఎస్. ఫణికుమార్ మంగళవారం విడుదల చేసిన ప్రకటనలో ఈ విషయాన్ని వెల్లడించారు. డాక్టర్ శ్రావణిదేవి ఒక వినూత్నమైన, లోతైన అభ్యాస చట్రాన్ని అభివృద్ధి చేయడం ద్వారా పరిమిత డేటాసెట్లు, అసమతుల్య తరగతి పంపిణీలు, అధిక-డైమెన్షనల్ ఇమేజ్ ఫీచర్లు వంటి ఆటోమేటెడ్ రెటీనా వ్యాధి నిర్ధారణలో కీలక సవాళ్లను పరిష్కరించినట్టు తెలియజేశారు.

ఆమె అధ్యయనం డీసీజీఏఎన్ అండ్ వీఏఈలను కలిపి అధిక నాణ్యత సింథటిక్ రెటీనా చిత్రాలను రూపొందించడానికి ద్వంద్వ నమూనా డేటా ఆగ్మెంటేషన్ వ్యూహాన్ని ప్రవేశపెట్టడమే గాక, వర్గీకరణ నమూనాల పనితీరును గణనీయంగా మెరుగుపరచిందన్నారు. బదిలీ అభ్యాస నమూనాలను ఎల్వీ ప్రసాద్ నేత్ర వైద్యశాల నుంచి వాస్తవ ప్రపంచ క్లినికల్ డేటాసెట్లను ఉపయోగించి శిక్షణ పొందడమే గాక, ధృవీకరించినట్టు తెలిపారు. వినియోగదారు స్నేహపూర్వక స్ట్రీమ్ లిట్ ఆధారిత వెబ్ ఇంటర్ ఫేస్ కూడా అభివృద్ధి చేసి, ఇది వైద్యులు వినియోగించే సమయంలో సంభాషించడానికి కూడా వీలు కల్పిస్తుందని పేర్కొన్నారు. గీతం హైదరాబాద్‌ అదనపు ఉపకులపతి ప్రొఫెసర్ డీ.ఎస్.రావు, గీతం రెసిడెంట్ డైరెక్టర్ డీవీవీఎస్ఆర్ వర్మ, స్కూల్ ఆఫ్ టెక్నాలజీ డైరెక్టర్ ప్రొఫెసర్ వీ.ఆర్. శాస్త్రి, అసోసియేట్ డైరెక్టర్ ప్రొఫెసర్ ఎన్. సీతారామయ్య, సీఎస్ఈ విభాగాధిపతి ప్రొఫెసర్ షేక్ మహబూబ్ బాషా, పలు విభాగాల అధిపతులు, అధ్యాపకులు, సిబ్బంది తదితరులు డాక్టర్ శ్రావణిదేవిని ప్రశంసించినట్టు వారు పేర్కొన్నారు.