గోపేశ్వర్:  ఉత్తరాఖండ్‌ రాష్ట్రం చమోలి(Chamoli) జిల్లాలోని నందనగర్‌లో గురువారం జరిగిన భారీ వర్షం తర్వాత ఒక గ్రామంలో కొండచరియలు విరిగిపడి ఇళ్లు కూలిపోవడంతో, నది వరదల్లో చిక్కుకున్న మరో గ్రామంలో పది మంది గల్లంతయ్యారు. కుంటారి గ్రామంలో కొండచరియలు విరిగిపడిన ఘటనలో దాదాపు అరడజను ఇళ్లు దెబ్బతిన్నాయని, ఆ గ్రామంలో ఒకే కుటుంబానికి చెందిన నలుగురు సభ్యులు సహా ఎనిమిది మంది గల్లంతయ్యారని చమోలి జిల్లా మేజిస్ట్రేట్ (డిఎం) సందీప్ తివారీ తెలిపారు. మిగతా ఇద్దరు దుర్మా గ్రామానికి చెందినవారు. మోక్ష నది ఉధృతంగా ప్రవహిస్తున్న వరదల కారణంగా అనేక భవనాలు దెబ్బతిన్నాయని ఆయన తెలిపారు. కుంటారిలో, స్థానిక సహాయ, రెస్క్యూ బృందాలు గల్లంతైన వారి కోసం గాలింపు చర్యలు నిర్వహిస్తున్నాయి. నందనగర్‌కు వెళ్లే రహదారి శిథిలాల కారణంగా మూసుకుపోయిందని డిఎం తెలిపారు. జిల్లా విపత్తు నిర్వహణ కార్యాలయం జారీ చేసిన జాబితా ప్రకారం, గల్లంతైన వారిని కున్వర్ సింగ్ (42), అతని భార్య కాంతా దేవి (38),  వారి ఇద్దరు కుమారులు వికాస్, విశాల్, నరేంద్ర సింగ్ (40), జగదాంబ ప్రసాద్ (70),  అతని భార్య భాగ దేవి (65), దేవేశ్వరి దేవి (65) గా గుర్తించారు.