భదేర్వా: జమ్మూ కాశ్మీర్‌లోని దోడా జిల్లాలో గురువారం ఒక ఆర్మీ ట్రక్కు(Army vehicle) అదుపుతప్పి లోతైన లోయలో పడిపోవడంతో పది మంది సైనికులు మరణించగా, మరో 11 మంది గాయపడ్డారని అధికారులు తెలిపారు. భదేర్వా-చంబా అంతర్రాష్ట్ర రహదారిపై 9000 అడుగుల ఎత్తులో ఉన్న ఖన్నీ టాప్ వద్ద గురువారం మధ్యాహ్నం ఈ ప్రమాదం జరిగింది. ఎత్తైన ప్రాంతంలోని ఒక పోస్టు వైపు వెళ్తున్న బుల్లెట్‌ప్రూఫ్ ఆర్మీ వాహనం 'కాస్పిర్' డ్రైవర్ నియంత్రణ కోల్పోవడంతో, ఆ వాహనం 200 అడుగుల లోతైన లోయలో పడిపోయింది. సైన్యం పోలీసుల సంయుక్త సహాయక చర్యను తక్షణమే ప్రారంభించగా, నలుగురు సైనికులు సంఘటనా స్థలంలోనే మరణించి ఉన్నట్లు గుర్తించామని, మరో 11 మందిని గాయపడిన స్థితిలో రక్షించామని అధికారులు తెలిపారు. లోయలో పడిపోవడంతో సైనిక వాహనం తీవ్రంగా దెబ్బతింది.  గాయపడిన పలువురు సైనికులను ప్రత్యేక చికిత్స కోసం ఉధంపూర్‌లోని సైనిక ఆసుపత్రికి హెలికాప్టర్లలో తరలించారు.