ఆర్ఎంపీల చేతిలో ఆరిపోతున్న అమాయక ప్రజల ప్రాణాలు

గర్భంలోనే పిండాన్ని నలిమేసి, సొమ్ము చేసుకుంటున్న ఆర్ఎంపీలు

మరిపెడ (విజయక్రాంతి): మహబూబాబాద్ జిల్లా మరిపెడ మండలం కేంద్రంలో చదువు చారెడు వైద్యం బోలెడు అన్న చందంలో ఆర్ఎంపీల తీరు సాగుతుంది. వారి వ్యాపారం మూడు సిరంజీలు ఆరు అబార్షన్లుగా సాగుతోంది. వీరు కేవలం ప్రధమ చికిత్స మాత్రమే చేయాల్సి ఉంటుంది. వీరి వద్ద కేవలం ప్రధమ చికిత్సకు సంబంధించిన మందులు మాత్రమే ఉండాలి. కానీ వీరి వద్ద మోతాదుకు మించి యాంటీబయాటిక్ స్టెరాయిడ్ అబార్షన్లకు సంబంధించిన మందులు కట్టలు కట్టలుగా ఉంటున్నాయంటే అతిశయోక్తి కాదు.

వీరు మరిపెడ మండలంలో గిరిజన ప్రాబల్యం ఎక్కువగా ఉన్న  మండల కేంద్రంలో అమాయక గిరిజన ప్రజలను ఆసరాగా చేసుకుని అధిక డబ్బులకు ఆశపడి చిన్న చిన్న వైద్యానికి జిల్లా కేంద్రాలలో ఉన్నటువంటి సూపర్ స్పెషాలిటీ ఆసుపత్రులకు అనుసంధానం చేసుకొని వీరిని ఇక్కడి నుండి అక్కడికి పంపించి. ఆసుపత్రి యాజమాన్యానికి సగం డబ్బులు ఆర్ఎంపీ డాక్టర్ కు సగం డబ్బులు తీసుకుంటూ కంటికి కనపడకుండా దోచుకొని సూపర్ స్పెషాలిటీ ఆసుపత్రి స్థాయిలో మరిపెడ బంగ్లా లోనే వైద్యమును చేస్తున్నారు. అంతేకాకుండా లింగ నిర్ధారణ పరీక్షలు చేపిస్తూ బ్రూణ హత్యలకు పాల్పడుతున్నారు. లింగ నిర్ధారణ పరీక్ష నిర్వాహకుడితో మొదటగానే ఫీజు మాట్లాడుకుని మరిపెడ మండల కేంద్రం నుండి ఖమ్మం, కూసుమంచి నెక్కొండ ,మహబూబాబాద్, సూర్యాపేట, లేదా జిల్లా కేంద్రాలకు తీసుకెళ్లి ఒకవేళ గర్భంలో ఉన్నది ఆడపిల్ల అని తేలితే ఆ అబార్షన్ చేయడానికి మరొక ఫీజు మాట్లాడుకుని వీరి ఇరువురు కలిసి వారి అమాయకత్వాన్ని సొమ్ము చేసుకుంటున్నారు.

ఇదంతా ఒక ఎత్తైతే ఒకవేళ స్కానింగ్ సెంటర్ నిర్వాహకుడు మొదటగా చెప్పిన విధంగా గర్భంలో ఉన్నటువంటి పిండం పాపగా చెప్పి ఒకవేళ అబార్షన్ చేసే సమయంలో మగ శిశువుగా ఉంటే వారు స్కానింగ్ సెంటర్ నిర్వాహకుడితో మళ్లీ పిండాలపై బేర సారాలు నిర్వహించుకుంటున్నట్లు సమాచారం ఉంది. అంతేకాకుండా ఫార్మసిస్టులు లేని మెడికల్ షాపులకు ప్రిస్క్రిప్షన్లు రాస్తూ వారి వద్ద నుండి అధిక మోతాదులో సంపాదిస్తున్నట్లు తెలుస్తుంది. మందులు కేవలం వీరి బాగోగుల నిమిత్తమే రాస్తున్నట్లు తెలుస్తుంది. ఆర్ఎంపీ డాక్టర్ కు మెడికల్ షాపుకు మధ్యవర్తిగా మెడికల్ రిప్రెసెంటేటివ్ అనుసంధానకర్తగా వ్యవహరిస్తున్నట్లు సమాచారం.

ఆ మెడికల్ రిప్రజెంటేటివ్ సదరు ఆర్.ఎం.పి డాక్టర్ తో ఒప్పందం కుదుర్చుకున్నాక దానికి సంబంధించిన మందులను రాయడానికి మెడికల్ షాప్ లో మందులను డంపు చేసి అవసరం ఉన్నా లేకున్నా వారికి పది రోజుల నుండి 15 రోజుల వరకు రాస్తూ, వారు కష్టపడ్డ శ్రమను వీరు ఇరువురు(మెడికల్ షాప్ యాజమాని ఆర్ఎంపీ డాక్టర్లు) జలగ లాగా పిక్కో తింటున్నారు. ఇంత జరుగుతున్నప్పటికీ జిల్లా వైద్య అధికారులు మరియు రాష్ట్ర మెడికల్ కౌన్సిల్ అసోసియేషన్ వారు నిమ్మకు నీరెత్తుతున్నట్లు వ్యవహరిస్తుండడం పలు అనుమానాలకు తావిస్తుంది. అదేవిధంగా ఎవరైనా జిల్లా వైద్యాధికారులకు సమాచారం ఇస్తే వారు ఈ ఆర్ఎంపీలతో కుమ్మక్కై ఫలానా వ్యక్తి సమాచారం ఇచ్చినాడు అని వారికి చెప్పడంతో వీరిద్దరికీ (జిల్లా వైద్యాధికారికి ఆర్.ఎం.పి) డాక్టర్కు ఉన్న సంబంధాన్ని బలపరుస్తుంది. ఇట్టి విషయంలో సదరు ఆర్ఎంపీ డాక్టర్ లపై లోతుగా సమాచారం ఉన్నప్పటికీ వైద్యాధికారులకు సమాచారం ఇవ్వడానికి ఎవరు ముందుకు రావడం లేదు. బంగ్లాలో హైడ్రోసిల్ , గర్భవిచ్చితి, సున్తీ, పెదవి పై పూత వస్తే పెదవులను కట్ చేసి పెదవులకు ఆపరేషన్లు, అదేవిధంగా బ్రూణ హత్యలు ఇవన్నీ విచ్చలవిడిగా వైద్యాధికారుల అండదండలతోనే నడుస్తున్నట్లు ప్రజలు మాట్లాడుకుంటున్నారు.

ఆర్ఎంపిలు పరిమితికి మించి ఎవరైనా వైద్యం చేస్తే, వారిపైన చట్టరీత్యా చర్యలు తీసుకొని పర్మినెంట్గా క్లినిక్ క్లోజ్ చేసి కేసు నమోదు చేయడం జరుగుతుంది. గతంలో కూడా మరిపెడ నుంచి  రైడ్ చేసి రెండు క్లినిక్ క్లోజ్ జరిగింది.

రవి రాథోడ్

మహబూబాబాద్ జిల్లా వైద్యాధికారి