ఆంధప్రదేశ్‌పై తుఫాను ప్రభావం

1. ఆది, సోమవారాల్లో భారీ నుంచి అతిభారీ వర్షాలు
2. గంటకు 60 కిమీ వేగంతో ఈదురు గాలులు
3. పలు జిల్లాలకు ఏపీ రాష్ట్ర విపత్తు నిర్వహణ సంస్థ రెడ్‌అలెర్ట్

హైదరాబాద్/ అమరావతి/ కొలంబో, నవంబర్ 29 (విజయక్రాంతి): ఆంధ్రప్రదేశ్ ప్రజలు ‘మొంథా’ తుఫాన్ బీభత్సం మరువకముందే మరో తుఫాన్ ముంచుకొ స్తున్నది. శుక్ర, శనివారాల్లో శ్రీలంకను అతలాకతలం చేసిన ఈ తుఫాన్ ఇప్పుడు ఏపీ దిశగా పయనిస్తున్నది. వాయుగుండ నైరుతి బంగాళాఖాతం నుంచి శ్రీలంక తీరానికి దగ్గరగా, తమిళనాడు రాజధాని చెన్నైకి 400 కిమీ కేంద్రీకృతమై ఉంది.

ఆదివారం ఉద యం నాటికి తుఫాన్ ప్రభావం తమిళనాడుతోపాటు ఏపీ తీర ప్రాంతంపై పడనుంది. ఏపీ ప్రభుత్వం తీర ప్రాంత జిల్లాలకు ఇప్పటికే రెడ్ అలెర్ట్ జారీ చేసింది. తుఫాన్ ప్రవేశించాక గంటకు 60 కిమీ వేగంతో ఈదురుగాలులు వీస్తాయని, మూడు రోజులపాటు భారీ నుంచి అతిభారీ వర్షాలు కురుస్తాయని ఆ రాష్ట్ర విపత్తు నిర్వహణ సంస్థ ప్రకటించింది.

మత్స్యకారులెవరూ చేపల వేటకు సముద్రంలోకి వెళ్లరాదని హెచ్చరికలు జారీ చేసింది. నెల్లూరు, తిరుపతి, చిత్తూరు జిల్లాలకు రెడ్ అలెర్ట్, ప్రకాశం, కడప, అన్నమయ్య జిల్లాలకు ఆరెంజ్ అలెర్ట్, గుంటూరు, బాపట్ల, పల్నాడు, నంద్యాల, కర్నూలు, అనంతపురం, సత్యసాయి జిల్లాలకు ఎల్లో అలెర్ట్ చేసింది. 

శ్రీలంకలో విషాదం.. 153కి చేరిన మృతుల సంఖ్య 

దిత్వా తుఫాన్ తాకిడికి శ్రీలంక అతలాకుతలమైంది. శుక్ర, శనివారం కురిసిన భారీ వర్షాల కారణంగా లోతట్టు ప్రాంతాల్లోకి వరదలు వచ్చి, కొండచరియలు విరిగిపడి 153 మంది మృతిచెందారు. మరో 191 మంది గల్లంతయ్యారు. వారి ఆచూకీ కోసం రెస్క్యూ సిబ్బంది గాలింపు చర్యలు కొనసాగిస్తున్నారు. తుఫాను ప్రభావం దేశవ్యాప్తంగా 5 లక్షల మందిపై పడింది. ముంపువాసులు సుమారు 800కి పైగా పునరావాస కేంద్రాల్లో తలదాచుకుంటున్నారు.

ఏకధాటిగా కురుస్తున్న వర్షాలకు దేశ రాజధాని కొలంబోకు 20 కిలోమీటర్ల దూరంలో ప్రవాహిస్తున్న కేళనీ నది శనివారం ఉప్పొంగింది. వరదల తాకిడికి వందలాది ఇళ్లు నేలమట్టమయ్యాయి. గుడిసెలు కొట్టుకుపోయాయి. ప్రజలకు సాయం అందించేందుకు పోలీసులు, రెస్క్యూ, సైనిక బృందాలు రంగంలోకి దిగాయి. వరదల్లో చిక్కుకుపోయిన కుటుంబాలను సురక్షిత ప్రాంతాలకు తరలించాయి. అవసరమైనచోట్ల ఆహార పొట్లాలు పంపిణీ చేశాయి.

ఆ దేశాధ్యక్షుడు అనుర కుమార దిస నాయకే ఇప్పటికే దేశవ్యాప్తంగా అత్యవసర పరిస్థితి ప్రకటించారు. సాయంత్రానికి తుఫాను తీరం దాటటంతో అక్కడి ప్రజలు ఊపిరి పీల్చుకున్నారు. ఆ దేశానికి బాసట నిలిచేందుకు ఇప్పటికే భారత్ ‘ఆపరేషన్ సాగర్ బంధు’ పేరుతో రెండు దఫాలుగా దాదాపు 27 టన్నుల అత్యవసర సహాయ సామగ్రిని చేరవేసిన సంగతి తెలిసిందే. 80 మందితో కూడిన రెండు జాతీయ విపత్తు ప్రతిస్పందన దళాన్ని పంపించింది. అలాగే ఐఎన్‌ఎస్ విక్రాంత్ విమాన వాహక నౌకనూ అందుబాటులో ఉంచింది.

తెలంగాణపైనా ప్రభావం

దిత్వా తుఫాను ప్రభావం తెలంగాణపై కూడా పడనుందని హైదరాబాద్ వాతావరణ శాఖ ప్రకటించింది. ఆది, సోమవారం పలు జిల్లాల్లో వర్షాలు కురుస్తాయని పేర్కొంది. తొలిరోజు తేలిక పాటి నుంచి మోస్తరు వర్షాలు కురుస్తాయని తెలిపింది. సోమవారం ఖమ్మం, నల్లగొండ, సూర్యా పేట, నాగర్ కర్నూల్ జిల్లాల్లో అక్కడక్కడా భారీ వర్షాలు కురిసే అవకాశం ఉందని హెచ్చరించింది.