ఎన్‌కౌంటర్‌లో 15 మంది మావోయిస్టులు మృతి

చైబాసా: జార్ఖండ్‌లోని పశ్చిమ సింగ్‌భూమ్ జిల్లాలో గురువారం భద్రతా బలగాలతో జరిగిన ఎదురుకాల్పుల్లో కోటి రూపాయల రివార్డు ఉన్న అగ్ర నాయకుడు అనల్ దా సహా పదిహేను మంది మావోయిస్టులు మరణించారని పోలీసులు తెలిపారు. కిరిబురు పోలీస్ స్టేషన్ పరిధిలోని సరందా అటవీ ప్రాంతంలోని కుమ్డిలో జరుగుతున్న ఈ ఆపరేషన్‌లో సీఆర్పీఎఫ్ కోబ్రా యూనిట్‌కు చెందిన సుమారు 1,500 మంది సిబ్బంది పాల్గొంటున్నారని తెలిపారు. మావోయిస్టు అగ్ర నాయకుడు పతిరామ్ మాఝీ అలియాస్ అనల్ దా సహా 15 మంది మావోయిస్టుల మృతదేహాలను, భారీ మొత్తంలో ఆయుధాలు, మందుగుండు సామగ్రిని  స్వాధీనం చేసుకున్నట్లు అధికారులు తెలిపారు. ఉదయం 6 గంటలకు ప్రారంభమైన ఎదురుకాల్పులు ఇంకా కొనసాగుతున్నాయని పోలీసు ప్రధాన కార్యాలయం ఒక ప్రకటనలో తెలిపింది.