హైదరాబాద్: నల్గొండ జిల్లా(Nalgonda) గుర్రంపోడు మండలంలోని ములకపల్లి వద్ద మంగళవారం జరిగిన ఘోర రోడ్డు ప్రమాదంలో ఇద్దరు వ్యక్తులు మృతి చెందారు. మృతులను  పోచంపల్లి చెందిన సత్యనారాయణ, సైదులుగా గుర్తించారు. ఎదురుగా వస్తున్న వాహనాన్ని ఢీకొనకుండా తప్పించే ప్రయత్నంలో, సిమెంట్ విద్యుత్ స్తంభాలను తరలిస్తున్న ఒక ట్రాక్టర్ ములకపల్లి సమీపంలో బోల్తా పడటంతో ఈ ప్రమాదం సంభవించింది. ట్రాక్టర్ బోల్తా పడటంతో, ఆ వాహనానికి అమర్చిన ట్రాలీలో ప్రయాణిస్తున్న సత్యనారాయణ, సైదులుల పైకి విద్యుత్ స్తంభాలు కూలిపడ్డాయి. వారిద్దరూ తీవ్ర గాయాలకు గురై, అక్కడికక్కడే మరణించారు. ఈ ఘటనపై కేసు నమోదు చేసుకున్న పోలీసులు మృతదేహానలు స్వాధీనం చేసుకుని పోస్టుమార్టం నిమిత్తం మార్చురీకి తరలించారు.