విద్యుత్ షాక్‌తో రెండు ఏనుగులు మృతి

అమరావతి: తిరుపతి జిల్లాలోని(Tirupati District) చంద్రగిరి నియోజకవర్గంలోని ఎర్రావారిపల్లి మండలంలో ఆదివారం రాత్రి కరెంట్ వైర్లు తగలడంతో రెండు అడవి ఏనుగులు(Elephants) విద్యుదాఘాతానికి గురై మృతి చెందాయి. నేరబైలు గ్రామ సమీపంలోని మామిడి తోట చుట్టూ వేసిన విద్యుత్ కంచెను ఏనుగులు తాకడంతో అక్కడికక్కడే మృతి చెందినట్లు సమాచారం. సోమవారం కొంతమంది స్థానిక రైతులు ఏనుగుల మృతదేహాలను గమనించి అధికారులకు సమాచారం అందించడంతో ఈ సంఘటన వెలుగులోకి వచ్చింది. 

ఇటీవలి రోజుల్లో ఏనుగుల గుంపు తరచుగా సమీపంలోని గ్రామాలలోకి ప్రవేశించి పంట పొలాలను దెబ్బతీస్తున్నట్లు అధికారులు తెలిపారు. తమ తోటలు, పొలాలను రక్షించుకునే ప్రయత్నంలో, మామిడి తోట చుట్టూ విద్యుత్ తీగలు ఏర్పాటు చేశారు. ఏనుగులు ప్రమాదవశాత్తు వాటిని తాకడంతో ఈ ప్రమాదం జరిగింది. రైతుల నుండి సమాచారం అందుకున్న అటవీ శాఖ అధికారులు సంఘటనా స్థలానికి చేరుకుని సంఘటనపై విచారణ ప్రారంభించారు. ఏనుగుల మరణాలు స్థానికులను, వన్యప్రాణుల అధికారులను ఆందోళనకు గురిచేస్తున్నాయి.