హైదరాబాద్: మేడిపల్లి వద్ద బుధవారం తెల్లవారుజామున జరిగిన ఘోర రోడ్డు ప్రమాదంలో(Road Accident) ఇద్దరు యువకులు మృతి చెందగా, మరో ముగ్గురు తీవ్రంగా గాయపడ్డారు. వేగంగా వెళ్తున్న కారు అదుపుతప్పి మెట్రో పిల్లర్‌ను ఢీకొనడంతో పిల్లర్ నెం. 97 సమీపంలో ఈ ప్రమాదం జరిగింది. ఈ ధాటికి వాహనం పూర్తిగా నుజ్జునుజ్జు అయింది. వనపర్తి జిల్లాకు చెందిన ఇంజినీరింగ్, ఇతర డిగ్రీలు చదువుతున్న ఎనిమిది మంది విద్యార్థులు TS 32 G 1888 రిజిస్ట్రేషన్ నంబర్ గల కారులో బోడుప్పల్ నుండి ఐటీ పోచారం వైపు వెళ్తుండగా ఈ దుర్ఘటన చోటుచేసుకుంది.

పోలీసుల ప్రకారం, డ్రైవర్ అతివేగంగా వాహనం నడపడం వల్లే నియంత్రణ కోల్పోయి ఈ ఘోర ప్రమాదం జరిగిందని తెలుస్తోంది. సాయి వరుణ్, నిఖిల్ అనే ఇద్దరు విద్యార్థులు తీవ్ర గాయాలపాలై అక్కడికక్కడే మరణించారు. వెంకట్, రాకేష్, యశ్వంత్ అనే మరో ముగ్గురు తీవ్రంగా గాయపడ్డారు. ప్రస్తుతం ఒక ప్రైవేట్ ఆసుపత్రిలో చికిత్స పొందుతున్నారు. మిగిలిన విద్యార్థులైన సత్విక్, హర్షవర్ధన్, అభినవ్ స్వల్ప గాయాలతో బయటపడ్డారు. సమాచారం అందుకున్న మెడిపల్లి పోలీసులు సంఘటనా స్థలానికి చేరుకుని, గాయపడిన వారిని చికిత్స నిమిత్తం ఒక ప్రైవేట్ ఆసుపత్రికి తరలించారు. తరువాత మృతదేహాలను పోస్ట్‌మార్టం కోసం గాంధీ ఆసుపత్రికి తరలించారు. ఈ ఘటనపై కేసు నమోదు చేసి దర్యాప్తు చేస్తున్నారు.