శంషాబాద్ ప్రాథమిక ఆరోగ్య కేంద్రాన్ని 30 పడకల ఆసుపత్రిగా అప్‌గ్రేడ్ చేయండి

అత్యవసర వైద్య సేవలను ప్రజలకు అందించాలి, మంత్రి దామోదర రాజనర్సింహకు ఎమ్మెల్యే ప్రకాష్ గౌడ్ వినతి

రాజేంద్ర నగర్ ఫిబ్రవరి 25(విజయక్రాంతి): రాజేంద్రనగర్ నియోజకవర్గ పరిధిలోని శంషాబాద్ లోని ప్రాథమిక ఆరోగ్య కేంద్రాన్ని 30 పడకల ఆసుపత్రిగా అప్ గ్రేడ్ చేసి సౌకర్యాలు కల్పించాలని ఎమ్మెల్యే ప్రకాష్ గౌడ్ బుధవారం సచివాలయంలో రాష్ట్ర ఆరోగ్య, వైద్య మరియు కుటుంబ సంక్షేమ శాఖ మంత్రి దామోదర రాజనర్సింహని మర్యాదపూర్వకంగా విజ్ఞప్తి చేశారు.

ఈ సందర్భంగా శంషాబాద్ డివిజన్ పరిధిలోని ప్రజల ఆరోగ్య అవసరాలను దృష్టిలో ఉంచుకుని, అక్కడ ఉన్న ప్రాథమిక ఆరోగ్య కేంద్రాన్ని  30 పడకల ఆసుపత్రిగా అప్గ్రేడ్ చేయాలని కోరుతూ మంత్రికి వినతిపత్రం అందజేసినట్లు ఎమ్మెల్యే తెలిపారు శంషాబాద్ అంతర్జాతీయ విమానాశ్రయం మరియు పరిసర ప్రాంతాల్లో పెరుగుతున్న జనాభాకు అనుగుణంగా వైద్య సదుపాయాలు మెరుగుపరచాల్సిన అవసరం ఉందని ఎమ్మెల్యే మంత్రికి వివరించారు.

ప్రస్తుతం ఉన్న ప్రాథమిక ఆరోగ్య కేంద్రం పరిమిత సదుపాయాలతో ఉన్నందున, స్థానిక ప్రజలు అత్యవసర పరిస్థితుల్లో సుదూర ప్రాంతాలకు వెళ్లాల్సి వస్తోందని, దీనిని అప్గ్రేడ్ పేద ప్రజలకు మెరుగైన వైద్యం చేరువవుతుందని పేర్కొన్నారు. ఎమ్మెల్యే విజ్ఞప్తిపై మంత్రి దామోదర రాజనర్సింహ సానుకూలంగా స్పందించారు. ఈ ప్రతిపాదనను పరిశీలించి, నిబంధనల ప్రకారం త్వరితగతిన నిధులు మంజూరు చేసేందుకు మరియు ఆసుపత్రి స్థాయిని పెంచేందుకు చర్యలు తీసుకుంటామని మంత్రి హామీ ఇచ్చారు..