బేకింగ్ సోడాను సోడియం బైకార్బోనేట్ లేదా సోడియం హైడ్రోజన్ కార్బోనేట్ అని అంటారు. అలాగే.. దీనిని సోడా, తినే సోడా, వంట సోడా అని రకరకాల పేర్లతో పిలుస్తూ ఉంటారు. దీంతో ఎన్నో ఉపయోగాలుంటాయి. దోసెలు, ఇడ్లీలు, రొట్టెలు వంటివి మెత్తగా రావాలంటే చిటికెడు బేకింగ్ సోడా వేస్తే చాలు. అలాగే అరగ్లాసు నీటిలో చెంచా వంటసోడా వేసి పుక్కిలిస్తే నోటి దుర్వాసన దూరమవుతుంది.

ఒక్కోసారి కడుపు ఉబ్బరంగా అనిపిస్తుంది. అలాంటప్పుడు గ్లాసు నీటిలో అరచెంచా బేకింగ్ సోడా కలిపి తాగితే ఉపశమనం లభిస్తుంది. బేకింగ్ సోడా కలిపిన నీళ్లతో అరచేతులను శుభ్రం చేసుకుంటే మురికి మాయమవుతుంది. బేకింగ్ సోడా కలిపిన గోరువెచ్చని నీళ్లలో అరగంటపాటు పాదాలను ఉంచండి. పాదాలకు పట్టిన మురికి వదిలిపోతుంది.

అలాగే దీంతో గ్యాస్ స్టవ్, బాత్రూమ్, కార్పెట్లను క్లీన్ చేయొచ్చు. బేకింగ్ సోడాలో కాస్త వేడి నీరు, వెనిగర్ కలిపి పేస్ట్‌లా చేసి శుభ్రం చేయాలనుకున్న ప్రదేశంలో రాయాలి. పావుగంట తర్వాత అక్కడ బ్రష్‌తో రుద్దితే మురికి శుభ్రమవుతుంది.