పట్నా: బీహార్‌లోని బెగుసరాయ్ జిల్లాలో భద్రతా సిబ్బందితో జరిగిన ఎదురుకాల్పుల్లో రూ. 50,000 బహుమతి ఉన్న ఒక నక్సలైట్(Wanted Naxal) హతమయ్యాడని పోలీసులు తెలిపారు. మృతుడిని నిషేధిత సీపీఐ-మావోయిస్టు పార్టీకి చెందిన ఉత్తర బీహార్ సెంట్రల్ జోనల్ కమిటీ కార్యదర్శి దయానంద్ మలకర్‌గా గుర్తించినట్లు తెలిపారు.  బీహార్ పోలీసుల స్పెషల్ టాస్క్ ఫోర్స్ (ఎస్‌టిఎఫ్) విడుదల చేసిన ఒక ప్రకటన ప్రకారం, భద్రతా సిబ్బంది మలకార్ తన సహచరులతో కలిసి దాక్కున్న ప్రదేశానికి చేరుకున్నారు.

పోలీసులను గమనించిన మలకార్ తప్పించుకోవడానికి ప్రయత్నించి, పోలీసులపై కాల్పులు జరిపాడు. భద్రతా సిబ్బంది ఆత్మరక్షణ కోసం ఎదురు కాల్పులు జరిపారు. ఈ ఎదురుకాల్పుల్లో ఆ నక్సలైట్ గాయపడగా, అతని ఇద్దరు సహచరులను అరెస్టు చేశామని ఆ ప్రకటనలో తెలిపారు. మలకర్‌ను సమీపంలోని ప్రభుత్వ ఆసుపత్రికి తరలించగా, అక్కడ అతను మరణించినట్లు వైద్యులు ప్రకటించారు. ఈ ఎన్‌కౌంటర్‌లో భద్రతా సిబ్బందికి ఎవరికీ గాయాలు కాలేదని అందులో పేర్కొన్నారు. పోలీసులు సంఘటనా స్థలం నుండి ఒక 5.56 ఎంఎం ఇన్సాస్ రైఫిల్, ఒక నాటు తుపాకీ, 25 సజీవ తూటాలు మరియు 15 ఖాళీ తూటాలను కూడా స్వాధీనం చేసుకున్నారు.