పట్టు కోల్పోకుండా..

పట్టు చీరలు మహిళలకు మరింత ప్రత్యేకం. అయితే పట్టుచీరలు చాలా సున్నితంగా ఉంటాయి. వీటిని సరైన విధానంలో సంరక్షించుకోకుంటే మెరుపు కోల్పోయి పాతగా కనిపిస్తాయి. పట్టుచీరలు ఎక్కువకాలం మన్నికగా ఉండాలంటే ఎలాంటి జాగ్రత్తలు తీసుకోవాలో మీకు తెలుసా.. 

పట్టుచీరని ఒకసారి కట్టుకుని విడిచిన తర్వాత దానికి బాగా గాలి తగిలేలా ఆరేయాలి. తేమ, చల్లదనం లేకుండా పొడిగా ఆరిన తరవాతనే మడతపెట్టి భద్రపరచాలి. 

నాలుగైదుసార్లు కట్టుకున్న తర్వాత చీరని డ్రైక్లీనింగ్ చేయించవచ్చు. దీనివల్ల పట్టు చీర మెరుపు పోకుండా ఉంటుంది. చీర మీద చిన్న మరకలు లేదా మురికి అంటితే అక్కడ మాత్రమే. నీళ్లతో తడిపిన దూదితో తుడవాలి. కొద్దిగా గ్లిజరిన్ రాసి పలుచని బట్టతో తుడిచినా మరకలు పోతాయి. 

పట్టు చీరని శుభ్రం చేయాలనుకుంటే మొదటిసారి మాత్రం డ్రైక్లీనింగ్ చేయించాలి. తర్వాత తగిన జాగ్రత్తలు తీసుకుంటూ నీళ్లలో ముంచి ఉతకవచ్చు. నీళ్లలో కొద్ది మోతాదులో బేబీ షాంపూని మాత్రమే కలపాలి. డిటర్జెంట్, సర్ఫ్ కలపకూడదు. చీరని నీళ్లలో ఎక్కువసేపు నాననివ్వకూడదు. చేతులతో గట్టిగా పిండకూడదు.