ఫిన్టెక్ కేంద్రంగా హైదరాబాద్
- గ్లోబల్ ఫైనాన్షియల్ సెంటర్‌గా తీర్చిదిద్దడమే లక్ష్యం
- ఐటీ, పరిశ్రమల మంత్రి దుద్దిళ్ల శ్రీధర్‌బాబు
- హైటెక్ సిటీలో ‘ఆర్థా ఫిన్టెక్’ నూతన కార్యాలయం ప్రారంభం
నవంబర్ 7 (విజయక్రాంతి) : ఫిన్ టెక్, గ్లోబల్ ఫైనాన్షియల్ సర్వీసెస్ రంగాలకు(Fintech, global financial services sector) హైదరాబాద్‌ను అంతర్జాతీయ స్థాయి కేంద్రంగా తీర్చిదిద్దాలన్నదే తమ లక్ష్యమని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు(Duddilla Sridhar Babu) పేర్కొన్నారు. ప్రపంచ స్థాయి డిజిటల్ మౌలిక సదుపాయాల కల్పన, అడ్వాన్డ్స్ టెక్నాలజీలో పరిశోధన, అభివృద్ధి (ఆర్ అండ్ డీ)కి ప్రోత్సాహం, పరిశ్ర మల అవసరాలకు అనుగుణంగా నైపుణ్యం కలిగిన మానవ వనరులను తీర్చిదిద్దడంపై ప్రత్యేక దృష్టి సారించామన్నారు.
సింగపూర్ కేంద్రంగా పనిచేస్తున్న ఆర్థా ఫిన్టెక్ హైదరాబాద్ కార్యాలయాన్ని శనివారం హైటెక్ సిటీలో ఆయన ప్రారంభించారు. ఈ సందర్భంగా మంత్రి మాట్లాడుతూ ఐటీ, ఐటీఈఎస్ రంగంలో హైదరాబాద్ సా ధించిన అంతర్జాతీయ గుర్తింపును ఫిన్టెక్, డిజిటల్ బ్యాంకింగ్, గ్లోబల్ ఫైనాన్షియల్ సర్వీసెస్ రంగాలకూ విస్తరించేలా ప్రణాళికాబద్ధంగా కృషి చేస్తున్నామని తెలిపారు. తెలంగాణ రైజింగ్ విజన్‌లో భాగంగా పెట్టుబడులకు, ఆవిష్కరణలకు, ఎమర్జింగ్ టెక్నాలజీస్‌కు దేశంలోనే అత్యుత్తమ గమ్యస్థానంగా తెలంగాణను తీర్చి దిద్దేందుకు చిత్తశుద్ధితో కృషి చేస్తున్నామని పేర్కొన్నారు.
గ్లోబల్ కంపెనీలు తమ కార్యకలాపాలను హైదరాబాద్ కు విస్తరించేలా ‘ఇండస్ట్రియల్ అండ్ టెక్నాలజీ ఎకో సిస్టం‘ను మరింత బలోపేతం చేస్తున్నామని వెల్లడించారు. బ్యాంకింగ్-యాజ్-ఏ-సర్వీస్, ఓపెన్ బ్యాంకింగ్ ఏపీఐలు, ఆటోమేటెడ్ ఆన్ బోర్డింగ్, కేవైసీ/కేవైబీ, ఏఎంఎల్, అంతర్జాతీయ చెల్లింపులు, డిజిటల్ వాలెట్ మౌలిక సదుపా యాలు తదితర ఫైనాన్షియల్ టెక్నాలజీ పరిష్కారాలను ఆర్థా ఫిన్ టెక్ అందిస్తోందని మంత్రి శ్రీధర్ బాబు వివరించారు. కార్యక్రమం లో ఆర్థా ఫిన్ టెక్ సీఈఓ మధుబాబు గడిపాటి, ఆర్మిన్ ఒర్డోడరీ, ఇమాన్యుయేల్ సీ. ఫెర్నాండెస్ తదితరులు పాల్గొన్నారు.
