అబ్దుల్ నగరంలో వీధి దీపం లేక అంధకారం

బొడ్డెమ్మ పాటలకూ ఆటంకం - మహిళల ఆవేదన

తరిగొప్పుల, అక్టోబర్ 7 (విజయక్రాంతి): జనగామ జిల్లా తరిగొప్పుల మండలం అబ్దుల్ నగరం గ్రామంలో(Abdul Nagaram villagers) ప్రధాన రహదారి అయిన తరిగొప్పుల - హనుమకొండ మార్గంలో రాముని సత్తయ్య కిరాణం దుకాణం వద్ద వీధి దీపం లేకపోవడంతో గ్రామం చీకటిలో మగ్గుతోంది. బతుకమ్మ పండుగ సందర్భంగా ఆడపిల్లలు బొడ్డెమ్మ పాటలు పాడుకుంటూ ఆడుకునే సమయంలో చీకటి కారణంగా తీవ్ర ఇబ్బందులు పడుతున్నారని మహిళలు ఆవేదన వ్యక్తం చేస్తున్నారు.

రాత్రి వేళల్లో ప్రయాణికులు, చిన్నారులు భయంతో రోడ్డుపై నడవలేని పరిస్థితి నెలకొంది. ఎన్నిసార్లు అధికారులకు, సర్పంచ్ కు చెప్పినా పట్టించుకోవడం లేదని గ్రామస్తులు మండిపడుతున్నారు. ఇప్పటికైనా సంబంధిత అధికారులు స్పందించి వెంటనే వీధి దీపాన్ని ఏర్పాటు చేయాలని గ్రామ మహిళలు డిమాండ్ చేస్తున్నారు.