ఆశ వర్కర్ల సమస్యల పరిష్కారానికి ఎమ్మెల్యే పోచారంకు వినతి

బాన్సువాడ, నవంబర్ 10 (విజయ క్రాంతి): ఆశ వర్కర్స్ యూనియన్(ASHA Workers' Union) రాష్ట్ర కమిటీ పిలుపు మేరకు సీఐటీయూ(CITU) ఆధ్వర్యంలో ఆశ వర్కర్స్ యూనియన్ జిల్లా కమిటీ నాయకులు, ఆశ వర్కర్లు మంగళవారం కామారెడ్డి జిల్లా(Kamareddy District) బాన్సువాడ ఎమ్మెల్యే పోచారం శ్రీనివాస్ రెడ్డిని(Pocharam Srinivas Reddy) తన నివాసంలో కలిసి తమ సమస్యల పరిష్కారం కోరుతూ వినతిపత్రం అందజేశారు.ఆశ వర్కర్లకు కనీస వేతనం నెలకు రూ.18 వేలుగా నిర్ణయించాలని, ఉద్యోగ భద్రత(Job security) కల్పించాలని, ఈఎస్ఐ సౌకర్యం అమలు చేయాలని ప్రధానంగా డిమాండ్ చేశారు.

ఈ సందర్భంగా ఎమ్మెల్యే పోచారం శ్రీనివాస్ రెడ్డి సానుకూలంగా స్పందిస్తూ.. ఆశ వర్కర్ల సమస్యలను ప్రభుత్వం దృష్టికి తీసుకెళ్లడంతో పాటు ఆరోగ్యశాఖ మంత్రితో మాట్లాడి సమస్యల పరిష్కారానికి కృషి చేస్తానని హామీ ఇచ్చారు. బాన్సువాడ నియోజకవర్గ పరిధిలో పనిచేస్తున్న సుమారు 180 మంది ఆశ వర్కర్లలో అర్హులైన ప్రతి ఒక్కరికీ డబుల్ బెడ్‌రూమ్ ఇల్లు అందించేందుకు కృషి చేస్తానని భరోసా ఇచ్చారు.

అదేవిధంగా బాన్సువాడ ప్రభుత్వ ఆసుపత్రిలో ప్రసవాల కోసం గర్భిణులను తీసుకొచ్చే ఆశ వర్కర్లకు విశ్రాంతి గది అవసరమనే విషయాన్ని ఎమ్మెల్యే దృష్టికి తీసుకెళ్లగా, ఆసుపత్రి సూపరింటెండెంట్‌తో మాట్లాడి ప్రత్యేక విశ్రాంతి గది ఏర్పాటు చేయించారు.తమ సమస్యలపై ఎమ్మెల్యే సానుకూలంగా స్పందించి తక్షణమే విశ్రాంతి గది ఏర్పాటు చేయించడంతో ఆశ వర్కర్లు హర్షం వ్యక్తం చేశారు. ఈ కార్యక్రమంలో సిఐటియు జిల్లా నాయకులు రవీందర్ ఆశ వర్కర్లు తదితరులు పాల్గొన్నారు.