వెంకగారి భూమయ్య :

భారత రాజకీయ పటంలో కేరళం ఒక అసాధారణ ప్రయోగశాల. దశాబ్దాలుగా ఎర్రజెండాకు, హస్తం పార్టీకి మధ్య మారుతూ వస్తున్న అధికారం ఈసారి సరికొత్త సమీకరణాల సుడిగుండంలో చిక్కుకుంది. కేరళం ఎన్నికల చరిత్రలో ఎన్నడూ లేని విధంగా ఒక స్పష్టమైన త్రిముఖ పోటీ ఛాయలు కనిపిస్తుండటం రాజకీయ విశ్లేషకులను సైతం ఆశ్చర్యానికి గురిచేస్తోంది. లెఫ్ట్ డెమొక్రటిక్ ఫ్రంట్ (ఎల్డీఎఫ్), యునైటెడ్ డెమొక్రటిక్ ఫ్రంట్ (యూడీఎఫ్)ల మధ్య సాగే ‘ద్వైపాక్షిక సమరం’ కాస్తా, ఇప్పుడు బీజేపీ నేతృత్వంలోని ఎన్డీఏ రాకతో త్రిముఖ వ్యూహంగా రూపాంతరం చెందింది.

ఈ మార్పు ఓట్ల చీలికకే పరిమితం కాకుండా, జాతీయ రాజకీయాల్లో తీవ్ర చర్చకు దారితీసిన ‘రహస్య పొత్తు’ ఆరోపణలకు వేదికైంది. ముఖ్యంగా కాంగ్రెస్ అగ్రనేత రాహుల్‌గాంధీ సంధించిన విమర్శనాస్త్రాలు కేరళం రాజకీయ వాతావరణాన్ని ఒక్కసారిగా వేడెక్కించాయి. సాధారణంగా కేరళం ఓటరు ఒక కూటమికి వరుసగా రెండోసారి అవకా శం ఇవ్వడం అరుదు. కానీ, పినరయి విజయన్ నేతృత్వంలోని కమ్యూనిస్ట్ పార్టీ (మార్క్సిస్ట్) ప్రభుత్వం పదేళ్లుగా అధికారాన్ని అనుభవిస్తూ, మూడోసారి కూడా పాగా వేయాలని చూస్తోంది.

ఈ పరంపరలో ఎదురవుతున్న అవినీతి ఆరోపణలు, కేంద్ర దర్యా ప్తు సంస్థల నిఘా వంటి అంశాలు పినరయి సర్కార్‌ను ఇరకాటంలో నెట్టాయి. అయితే, ఇదే సమయంలో కేంద్రంలోని బీజేపీ ప్రభు త్వం కేరళలోని వామపక్ష నాయకులపై వచ్చే ఆరోపణల పట్ల ఉదాసీన వైఖరిని అవలంభిస్తోందని రాహుల్‌గాంధీ చేసిన విమర్శలు సంచలనంగా మారాయి.

దేశవ్యాప్తంగా విప క్ష నేతలను జైలుకు పంపుతున్న ఈడీ, సీబీఐలు.. కేరళం ముఖ్యమంత్రి విషయంలో ఎందుకు మౌనంగా ఉన్నాయన్న ప్రశ్న ఇప్పుడు సామాన్య ఓటరు మదిలోనూ మెదులుతోంది. ఇది కేవలం కాంగ్రెస్‌ను దెబ్బతీయడానికి బీజేపీ, సీపీఐ(ఎం)లు పన్నిన వ్యూహమని, వారి మధ్య లోపాయికారీ అవగాహన కుదిరిందని రాహుల్ బలంగా వాదిస్తున్నారు.

ఈ రాజకీయ చదరంగంలో బీజేపీ వ్యూ హం కూడా అత్యంత పకడ్బందీగా కనిపిస్తోంది. కేరళంలో బలపడటం ద్వారా అటు వామపక్షాల హిందూ ఓటుబ్యాంకును, ఇటు కాంగ్రెస్ క్రైస్తవ ఓటుబ్యాంకును చీల్చడమే ఆ పార్టీ ప్రధాన లక్ష్యం. ఒకవేళ బీజేపీ గణనీయంగా ఓట్లను సాధించగలిగితే, అది సహజంగానే రెండో స్థానంలో ఉండే కాంగ్రెస్‌కు పెద్ద దెబ్బే అవుతుంది.

ఇదే తరుణంలో మైనారిటీల రక్షకుడిగా తామే ఉన్నామని చెప్పుకొనే లెఫ్ట్ ఫ్రంట్, బీజేపీతో రహస్య ఒప్పందం చేసుకుందన్న ప్రచారం మైనారి టీ ఓటర్లలో అయోమయాన్ని సృష్టిస్తోంది. ఈ గందరగోళం ఎవరికి వరంగా మారుతుందనేది ఇప్పుడు అత్యంత ఆసక్తికరమైన అంశం. మతపరమైన పోలరైజేషన్, రాజకీయ ప్రయోజనాల కోసం సిద్ధాంతాలను పక్కనపెట్టే ధోరణి కేరళం వంటి చైతన్యవంతమైన రాష్ట్రంలో ఎంతవరకు చెల్లుబాటు అవుతుందనేది సందేహమే.

మరోవైపు, పినరయి విజయన్ ఈ ఆరోపణలను తిప్పికొడుతూ కాంగ్రెస్ పార్టీయే బీజేపీకి బీటీటీమ్ అని విమర్శిస్తున్నారు. జాతీయ స్థాయిలో కాంగ్రెస్ బలహీనపడ టం వల్లే బీజేపీకి మార్గం సుగమమైందని, కేరళంలో తమను ఢీకొనే శక్తి లేకనే కాంగ్రెస్ ఇలాంటి అవాస్తవ ప్రచారాలకు తెరలేపింద ని వామపక్షాలు మండిపడుతున్నాయి.

అభివృద్ధి కార్యక్రమాలు, సంక్షేమ పథకాలు తమను గట్టెక్కిస్తాయని వారు నమ్ముతున్నారు. అయితే, త్రిముఖ పోటీ నెలకొన్న ప్రతి నియోజకవర్గంలోనూ గెలుపోటముల అంతరం కొన్ని వందల ఓట్లలోనే ఉండే అవకాశం ఉంది. ఈ పరిస్థితుల్లో ప్రతి చిన్న ఓటు చీలిక కూడా ఫలితాలను తారుమారు చేయగలదు. బీజేపీ ఎదిగేకొద్దీ కాంగ్రెస్ బలహీనపడటం, తద్వారా పరోక్షంగా లెఫ్ట్ ఫ్రంట్‌కు లబ్ధి చేకూరడమనే సమీకరణంపైనే రాహుల్‌గాంధీ దృష్టికేంద్రీకరించారు.

సాంస్కృతిక, సామాజిక సమీకరణాల మార్పు:

కేరళం సమాజం విద్యావంతులతో కూడినది కావడం వల్ల ఇక్కడ ప్రచారాల కంటే సిద్ధాంతాలకు ఎక్కువ విలువ ఉంటుంది. కానీ, ఈసారి అస్తిత్వ రాజకీయాలు తెరపైకి వచ్చాయి. శబరిమల వివాదం నుంచి నిన్న టి ‘లవ్ జిహాద్’, ‘నార్కోటిక్ జిహాద్’ వంటి అంశాల వరకు ప్రతీదీ ఒక వర్గాన్ని ప్రసన్నం చేసుకోవడానికో లేదా మరో వర్గాన్ని భయపెట్టడానికో ప్రచారంలోకి తెచ్చారని చెప్పవ చ్చు. ఈ క్రమంలో ఎల్డీఎఫ్ ప్రభుత్వం అనుసరిస్తున్న వ్యూహం చాలా చిత్రంగా ఉంది.

ఒకవైపు తాము లౌకికవాదులమని చెబుతూనే, మరోవైపు హిందూ సామాజికవ ర్గాల్లోని ఓటుబ్యాంకును కాపాడుకోవడానికి ప్రయత్నిస్తోంది. అదే సమయంలో క్రైస్తవ సామాజికవర్గంలో మారుతున్న ఆలోచనను తనకు అనుకూలంగా మలుచుకోవాలని చూస్తోంది. మరోవైపు ప్రతిపక్ష కాంగ్రెస్ పార్టీ ముస్లిం లీగ్‌తో తనకు ఉన్న సంబంధాల మూలంగా క్రైస్తవ ఓటర్లు దూరం కాకుండా చూసుకోవడానికి పడరాని పాట్లు పడుతోంది.

అవినీతి ఆరోపణలు  కేంద్ర సంస్థల పాత్ర:

బంగారం స్మగ్లింగ్ కేసు, లైఫ్ మిషన్ స్కామ్ వంటి అంశాలు పినరయి విజయన్ ప్రభుత్వాన్ని గత కొన్నేళ్లుగా వేధిస్తున్నాయి. అయితే, ఈ కేసుల్లో ప్రధాన నిందితులపై చర్యలు తీసుకుంటున్న కేంద్ర దర్యాప్తు సంస్థ లు ముఖ్యమంత్రి కార్యాలయం వరకు ఎం దుకు వెళ్లడం లేదన్నది రాహుల్‌గాంధీ లేవనెత్తిన ప్రధానాంశం. దేశంలోని ఇతర రాష్ట్రా ల్లో చిన్నపాటి ఆరోపణలకే ముఖ్యమంత్రులను గద్దె దించి, జైలుకు పంపుతున్న బీజేపీ ప్రభుత్వం..

కేరళంలో మాత్రం ‘వేచి చూసే ధోరణి’ని అవలంభిస్తోంది. దీని వెనుక ఉన్న అసలు ఉద్దేశం కాంగ్రెస్‌ను మరింత బలహీనపరచడమేనని విశ్లేషకుల అభిప్రాయం. కేరళంలో ఎల్డీఎఫ్ అధికారంలో ఉంటే జాతీయ స్థాయిలో కాంగ్రెస్ సీట్లు తగ్గుతా యి. తద్వారా కేంద్రంలో బీజేపీకి పోటీ తగ్గుతుంది. ఈ ‘పరస్పర సహకార’ రాజకీయాలే ఇప్పుడు కేరళం ఓటరు ముందున్న సవాలు.

వాగ్దానాలు వర్సెస్ వాస్తవాలు:

కేరళం మోడల్ అభివృద్ధి గురించి వామపక్షాలు గొప్పగా చెప్పుకొంటున్నప్పటికీ, ఆ రాష్ట్రం ఎదుర్కొంటున్న ఆర్థిక సంక్షోభం దాచలేని సత్యం. ప్రభుత్వ ఉద్యోగుల జీతా లు, పెన్షన్ల చెల్లింపులో జరుగుతున్న జాప్యం మధ్యతరగతి ఓటర్లను అసంతృప్తికి గురిచేస్తోంది. నిరుద్యో గం కారణంగా యువత ఇతర దేశాలకు వలస వెళ్తున్నారు. ఈ వైఫల్యాలను కప్పిపుచ్చుకోవడానికి మతపరమైన అంశాలను లేదా జాతీయ స్థాయి భావోద్వేగాలను వాడుకుంటున్నారా? అనే అనుమానం కలుగుతోంది. ఇదే సమయంలో బీజేపీ ‘డబుల్ ఇంజిన్ సర్కార్’ నినాదంతో మధ్యతరగతిని ఆకర్షించే ప్రయత్నం చేస్తోంది. 

నియోజకవర్గాల వారీగా సవాళ్లు:

త్రిముఖ పోటీ నెలకొన్న తిరువనంతపు రం, పాలక్కాడ్, త్రిసూర్ వంటి నియోజకవర్గాల్లో ఫలితాలు అంచనాలకు అందడం లేదు. ఇక్కడ బీజేపీ సాధించే ఓటు శాతం ఎవరిని గెలిపిస్తుందో, ఎవరిని ఓడిస్తుందో చెప్పలేం. కాంగ్రెస్ అభ్యర్థులు తమ సాంప్రదాయ ఓట్లను కాపాడుకోవడానికి కష్టపడు తుంటే, వామపక్ష అభ్యర్థులు ప్రభుత్వ వ్యతిరేకతను ఎదుర్కోవడానికి జాతీయ విపక్ష కూటమి (ఇండియా) కార్డును వాడుకుంటున్నారు.

విచిత్రమేమిటంటే, జాతీయ స్థాయి లో కలిసి ఉన్న కాంగ్రెస్, కమ్యూనిస్టు పార్టీలు కేరళంలో మాత్రం ఒకరినొకరు కత్తులు దూసుకుంటున్నాయి. ఈ వైరుధ్యం ఓటర్లలో ఒక విధమైన అసహనాన్ని కలిగిస్తోంది. కేరళం ఎన్నికలు ఇప్పుడు ఆ రాష్ట్ర సమస్యలకే పరిమితం కాలేదు. ఇది జాతీయ స్థాయి కూటముల భవిష్యత్తును, మరీ ముఖ్యంగా విపక్షాల ఐక్యతను పరీక్షించే యుద్ధంగా మారింది.

రాహుల్‌గాంధీ చేస్తున్న ‘రహస్య పొత్తు’ ఆరోపణలు ఓటర్లను ప్రభావితం చేస్తాయా? లేక పినరయి విజయన్ తన వ్యూహాలతో మూడోసారి అధికారాన్ని చేజిక్కించుకుంటారా? లేదా బీజేపీ ఆశించినట్లుగా కేరళంలో ఒక కొత్త శక్తిగా ఉద్భవిస్తుందా? అన్నది కాలమే నిర్ణయిస్తుంది. ఏదేమైనా సిద్ధాంతాల ముసు గులో జరుగుతున్న ఈ అధికార దాహపు పోరాటంలో అంతిమంగా కేరళం విజ్ఞుడైన ఓటరు తీర్పు ఎలా ఉంటుందో చూడాలి. తీరంలో మొదలైన ఈ రాజకీయ అలలు రేపు ఫలితాల రోజున ఎవరిని ముంచేస్తాయో, ఎవరిని తేలుస్తాయో వేచి చూడాల్సిందే.

 వ్యాసకర్త సెల్: 98485 59863