విజయ్ సేతుపతి హీరోగా నటిస్తున్న చిత్రం ‘ఏస్’. దర్శక, నిర్మాత అరుముగకుమార్ 7సీఎస్ ఎంటర్‌టైన్‌మెంట్స్ బ్యానర్‌పై రూపొందించారు. ఈ సినిమాలో విజయ్ సేతుపతికి జోడీగా రుక్మిణి వసంత్ నటించారు. మే 23న రిలీజ్‌కు సిద్ధంగా ఉన్న ఈ సినిమాను శ్రీ పద్మిణి సినిమాస్ బ్యానర్‌పై బీ శివప్రసాద్ తెలుగులో విడుదల చేస్తున్నారు. ఈ క్రమంలో హైదరాబాద్‌లో నిర్వహించిన ప్రీ రిలీజ్ ఈవెంట్ నిర్వహించారు.

ఈ ఈవెంట్‌లో హీరో విజయ్ సేతుపతి మాట్లాడుతూ.. “అరుముగ కుమార్ నాకు చాలా ఏళ్ల నుంచి తెలుసు. సినిమాలో నాకు మొదటి ఛాన్స్ ఇచ్చింది కూడా ఆయనే. మళ్లీ ఇప్పుడు ఆయనతో పనిచేస్తుండటం ఆనందంగా ఉంది” అన్నారు. దర్శక, నిర్మాత అరుముగ కుమార్ మాట్లాడుతూ.. “ఏస్’ సినిమాలో యాక్షన్, రొమాన్స్, ఫన్ ఇలా అన్ని కమర్షియల్ అంశాలతో ఫుల్ మీల్స్‌లా ఉంటుంది” అని చెప్పారు.

దర్శక, నిర్మాత బీ శివప్రసాద్ మాట్లాడుతూ.. “ఏస్’ ఆల్రెడీ బ్లాక్‌బస్టర్ హిట్ అయినట్టు కనిపిస్తోంది. విజయ్ సేతుపతి గారు మళ్లీ అందరినీ ఆకట్టుకోబోతున్నారు. అన్నీ సెట్ అయితే ‘రొమాంటిక్ డాన్’ అనే సినిమాను ఆయనతో త్వరలోనే ప్రకటిస్తా” అని తెలిపారు. ఇంకా ఈ కార్యక్రమంలో నటి దివ్యా పిళ్లు, నటుడు బబ్లూ పృథ్వీ తదితర చిత్రబృందం పాల్గొన్నారు.