హైదరాబాద్: తెలంగాణ రైతులకు మంజూరు చేసిన అవసరాలకు అనుగుణంగా యూరియాను వెంటనే సరఫరా చేయాలని తెలంగాణ రాష్ట్ర ముఖ్యమంత్రి రేవంత్ రెడ్డి(CM Revanth Reddy) కేంద్ర ప్రభుత్వాన్ని కోరారు. తెలంగాణ పార్లమెంటు సభ్యులు ఇప్పటికే కేంద్రమంత్రులతో ఈ సమస్యను లేవనెత్తారని, ఆమోదించబడిన కేటాయింపులు ఉన్నప్పటికీ రాష్ట్రానికి యూరియా తగినంతగా సరఫరా కాకపోవడం వల్ల తలెత్తే సమస్యలను ఎత్తిచూపారని ఆయన పేర్కొన్నారు. ప్రస్తుత ఖరీఫ్ సీజన్‌లో తెలంగాణకు 8.30 లక్షల మెట్రిక్ టన్నుల యూరియా కేటాయించినప్పటికీ, ఇప్పటివరకు 5.32 లక్షల మెట్రిక్ టన్నులు మాత్రమే సరఫరా అయ్యాయని - దాదాపు 3 లక్షల మెట్రిక్ టన్నుల కొరత ఉందని - రాష్ట్రవ్యాప్తంగా రైతులు తీవ్ర ఇబ్బందులకు గురవుతున్నారని సీఎం రేవంత్ ఎత్తి చూపారు. రాష్ట్ర పార్లమెంటు సభ్యులు కేంద్ర ఎరువులు, రసాయనాల మంత్రి జేపీ నడ్డా(Union Minister JP Nadda)కు సమర్పించిన విజ్ఞాపనను కూడా ఆయన ప్రస్తావించారు. 

ఈ విషయాన్ని తాను స్వయంగా కేంద్ర మంత్రితో చర్చించానని, రాష్ట్ర వ్యవసాయ మంత్రి తుమ్మల నాగేశ్వరరావు(Minister Thummala Nageswara Rao) కూడా ఈ సమస్యకు సంబంధించి కేంద్రానికి అనేకసార్లు లేఖలు రాశారని పేర్కొన్నారు. రాష్ట్ర వాస్తవ అవసరాలకు అనుగుణంగా యూరియాను సరఫరా చేయడంలో కేంద్ర ప్రభుత్వం విఫలమైందని ఆయన ఆరోపించారు. తెలంగాణ ఎంపీలు పార్లమెంటులో ఈ విషయాన్ని లేవనెత్తడం, రైతుల తరపున నిరసనలు నిర్వహించడం వంటివి పదే పదే ప్రయత్నాలు చేసినప్పటికీ, సరఫరా ఇప్పటికీ ఆమోదించబడిన కోటాకు సరిపోలడం లేదని, కేంద్రం తన నిరంతర నిర్లక్ష్యన్ని ఆయన విమర్శించారు. తెలంగాణ రైతుల ప్రయోజనాలను కాపాడేందుకు మంజూరు చేసిన కేటాయింపులకు అనుగుణంగా యూరియాను వెంటనే పంపిణీ చేయాలనే డిమాండ్‌ ను సీఎం రేవంత్ పునరుద్ఘాటించారు.