కటక్: గత 24 గంటల్లో ఎటువంటి హింసాత్మక సంఘటనలు జరగకపోవడంతో మంగళవారం కటక్(Cuttack) నగరంలోని హింసాకాండ ప్రభావిత ప్రాంతాల్లో కర్ఫ్యూను సడలించినట్లు పోలీసు కమిషనర్ ఎస్ దేవ్ దత్తా సింగ్(Police Commissioner S Dev Datta Singh) తెలిపారు. ఈ పొడిగింపుకు సంబంధించి కొత్త నోటిఫికేషన్ జారీ చేయలేదని తెలిపారు. నగరంలో పరిస్థితులు క్రమంగా సాధారణ స్థితికి చేరుకుంటున్నాయి. ప్రజలు తమ ఇళ్ల నుంచి బయటకు వచ్చి తమ రోజువారీ పనులను తిరిగి ప్రారంభిస్తున్నారు. నగరంలోని కొన్ని ప్రాంతాల్లో దుకాణాలు తెరుచుకుంటున్నట్లు కూడా వార్తలు వస్తున్నాయని పేర్కొన్నారు. అయితే, కటక్‌లో పరిస్థితిని పోలీసులు నిశితంగా పరిశీలిస్తున్నారని పోలీసు కమిషనర్ వెల్లడించారు. 

విశ్వ హిందూ పరిషత్ (Vishwa Hindu Parishad) సోమవారం ఇచ్చిన 12 గంటల బంద్ పిలుపు సమయంలో కూడా నగరంలోని ఏ ప్రాంతంలోనూ ఎలాంటి హింస జరిగినట్లు నివేదికలు రాలేదన్నారు. శని, ఆదివారాల్లో జరిగిన రెండు ఘర్షణల నేపథ్యంలో అక్టోబర్ 5 రాత్రి 10 గంటల నుండి అక్టోబర్ 7 ఉదయం 10 గంటల వరకు 36 గంటల పాటు కర్ఫ్యూ(Curfew) విధించారు. ఆదివారం సాయంత్రం జరిగిన హింస, విధ్వంసం, పోలీసులపై దాడికి పాల్పడినందుకు ఎనిమిది మందిని అరెస్టు చేసినట్లు పోలీస్ కమిషనర్ మీడియాకు తెలిపారు. "అనధికార ర్యాలీలో పాల్గొన్నవారు. హింసను ప్రేరేపించినవారు. వారికి మద్దతు ఇచ్చిన వారిని పోలీసులు తనిఖీ చేస్తున్నారు. అవసరమైతే మరిన్ని మందిని అరెస్టు చేస్తామని" ఆయన వెల్లడించారు. పరిస్థితిలో మెరుగుదల ఉందని, ఇంకేమీ అవాంఛనీయ సంఘటనలు జరగలేదన్నారు. ఈ రాత్రి పరిస్థితిని గమనించిన తర్వాత, పౌరుల సమస్యలు, ఇబ్బందులను ఎదుర్కోకుండా కర్ఫ్యూను సడలించే విషయాన్ని పరిగణించవచ్చని ఆయన స్పష్టం చేశారు.