హైదరాబాద్: హైదరాబాద్‌లోని కవాడిగూడకు చెందిన ఇద్దరు నివాసితులు వాట్సాప్ ద్వారా తమ మొబైల్ ఫోన్‌లకు వచ్చిన ఏపీకే ఫైల్‌ల(Android Application Package) ద్వారా సైబర్ మోసానికి గురయ్యారు. మొదటి కేసులో 48 ఏళ్ల బాధితుడికి “ఆర్టీఓ చలాన్” అనే ఏపీకే ఫైల్‌ వచ్చింది. దానిని అతను పొరపాటున తెరిచాడు. దీని ఫలితంగా రూ.51,226, రూ.50,000 అనధికారిక డెబిట్‌లు అయ్యాయి. రెండవ కేసులో 41 ఏళ్ల బాధితుడు తన హెచ్‌డీఎఫ్సీ బ్యాంక్ ఖాతా నుండి రూ.5 లక్షల విలువైన నాలుగు అనధికార లావాదేవీలను గమనించాడు. తర్వాత అతనికి తెలియకుండానే అతని ఫోన్‌లో “RTA చలాన్ 140.apk” అనే ఫైల్ ఇన్‌స్టాల్ కావడం గుర్తించాడు. ఏపీకేల ద్వారా బాధితులిద్దరి మొబైల్ ఫోన్లు హ్యాక్ అయ్యాయి. దీని ఫలితంగా మొత్తం రూ.6.01 లక్షల ఆర్థిక నష్టం వాటిల్లింది. మోసపోయామని గుర్తించిన బాధితులు పోలీసులను ఆశ్రయించారు.

మోసపూరిత ఏపీకే ఫైళ్ల పట్ల జాగ్రత్తగా ఉండాలని పోలీసులు ఒక అడ్వైజరీలో ప్రజలను కోరారు. మోసగాళ్ళు  వాట్సాప్(WhatsApp) గ్రూపులు, సందేశాల ద్వారా హానికరమైన ఏపీకే ఫైళ్లను ప్రసారం చేస్తున్నారు. ఒకసారి ఇన్‌స్టాల్ చేసిన తర్వాత, ఈ ఫైళ్లు బాధితుడి మొబైల్ ఫోన్, బ్యాంకింగ్ వివరాలను రహస్యంగా యాక్సెస్ చేస్తాయి. దీని వలన అనధికార లావాదేవీలు, భారీ ఆర్థిక నష్టాలు సంభవిస్తాయి. తెలియని వారినుంచి లేదా WhatsApp, SMS లేదా సోషల్ మీడియాలో షేర్ చేయబడిన లింక్‌ల నుండి ఫైల్‌లు లేదా అప్లికేషన్‌లను ఎప్పుడూ డౌన్‌లోడ్ చేయవద్దు లేదా ఇన్‌స్టాల్ చేయవద్దు పోలీసులు హెచ్చరించారు. అప్లికేషన్‌లను ఇన్‌స్టాల్ చేయడానికి Google Play Store / Apple App Store మాత్రమే ఉపయోగించండని సూచించారు. బ్యాంక్ వివరాలు, ఓటీపీలు లేదా వ్యక్తిగత సమాచారాన్ని ఎవరితోనూ పంచుకోవద్దని మందలించారు. నేషనల్ సైబర్ క్రైమ్ రిపోర్టింగ్ పోర్టల్ (www.cybercrime.gov.in)లో ఫిర్యాదు చేయండి లేదా 1930కు డయల్ చేయండి. సైబర్ మోసాలకు సంబంధించిన ఏదైనా అత్యవసర పరిస్థితిలో దయచేసి 8712665171కు కాల్ చేయండి లేదా వాట్సాప్ చేయాలని పోలీసులు ప్రజలను కోరారు.