అదనపు కలెక్టర్‌గా డాక్టర్ కిరణ్మయి బాధ్యతల స్వీకరణ

రంగారెడ్డి, ఏప్రిల్26 (విజయక్రాంతి) : జిల్లా అదనపు కలెక్టర్ (స్థానిక సంస్థలు)గా డాక్టర్ కిరణ్మయి కొప్పిశెట్టి ఆదివారం బాధ్యతలు స్వీకరించారు. ప్రభుత్వ బదిలీల ఉత్తర్వుల మేరకు, ఇప్పటివరకు కామారెడ్డి జిల్లా బాన్సువాడ సబ్ కలెక్టర్గా పనిచేసిన ఆమెను ప్రభుత్వం రంగారెడ్డి జిల్లాకు బదిలీ చేసింది. సెలవు రోజైనప్పటికీ, జిల్లా పాలనా యంత్రాంగం అవసరాల దృష్ట్యా ఆదివారం ఆమె తన నూతన బాధ్యతలను చేపట్టారు.

బాన్సువాడ సబ్ కలెక్టర్గా పనిచేసిన సమయంలో భూగర్భ జలాల సంరక్షణ, ధాన్యం కొనుగోలు కేంద్రాల పర్యవేక్షణ మరియు ప్రజా సమస్యల పరిష్కారంలో ఆమె తనదైన ముద్ర వేశారు.బాధ్యతలు స్వీకరించిన అనంతరం ఆమె మాట్లాడుతూ, జిల్లాలోని స్థానిక సంస్థల బలోపేతానికి, ప్రభుత్వ సంక్షేమ పథకాలను క్షేత్రస్థాయిలోకి తీసుకెళ్లేందుకు కృషి చేస్తానని పేర్కొన్నారు.ఆమె బాధ్యతలు స్వీకరించిన సందర్భంగా జిల్లా కలెక్టరేట్ అధికారులు మరియు సిబ్బంది ఆమెకు పుష్పగుచ్ఛాలు అందజేసి శుభాకాంక్షలు తెలిపారు.

జిల్లాలోని పురపాలక సంఘాలు (మున్సిపాలిటీలు), గ్రామ పంచాయతీల అభివృద్ధి పనులపై ఆమె త్వరలోనే సమీక్షా సమావేశం నిర్వహించనున్నారు. రంగారెడ్డి జిల్లా వంటి వేగంగా విస్తరిస్తున్న జిల్లాలో స్థానిక సంస్థల అదనపు కలెక్టర్ పాత్ర అత్యంత కీలకం. మౌలిక సదుపాయాల కల్పన మరియు పట్టణ ప్రణాళికా విభాగాలలో ఆమె అనుభవం జిల్లాకు ఎంతోదోహదపడుతుందని ప్రభుత్వం భావిస్తుంది.